"Orta dəhliz gələcəkdə Azərbaycan üçün valyuta axınının əsas mənbələrindən birinə çevrilə bilər" - RƏY
"Dünya iqtisadiyyatı və Azərbaycan"(Layihənin müəllifi Rüfət Quliyevdir)
Azərbaycan Baş nazir Əli Əsədov Türkmənistanın Avaza Milli Turizm Zonasında BMT-nin Dənizə Çıxışı Olmayan İnkişaf Etməkdə Olan Ölkələr üzrə III Konfransının plenar iclasında bildirib ki, Azərbaycan 2022-ci ildən etibarən Orta Dəhliz vasitəsilə yüklərin həcmində təxminən 90 % artıma nail olub, dəhliz boyunca tranzit müddəti əhəmiyyətli dərəcədə azalıb.
"Azərbaycan Şərq-Qərb və Şimal-Cənub nəqliyyat dəhlizlərinə mühüm töhfə verən ölkədir. Xəzər dənizində 50-dən çox gəmidən ibarət ən böyük ticarət donanması, hazırda 10 gəmi istehsal edən gəmiqayırma zavodu, yaxın illərdə gücü ildə 25 milyon tona çatacaq Bakı Beynəlxalq Dəniz Ticarət Limanı, Bakı-Tbilisi-Qars dəmir yolu, 9 beynəlxalq hava limanı, regionun ən böyük hava karqo şirkəti və bir çox digər amillər Azərbaycanı beynəlxalq nəqliyyat qovşaqlarından birinə çevirib. Nümunə olaraq, Çinin bir sıra şəhərlərindən konteyner blok-qatarlarının Bakıya cəmi 10-12 günə çatması Orta Dəhlizin mühüm ticarət marşrutu kimi əhəmiyyətini vurğulayır",- deyə o qeyd edib.
Orta dəhlizin Azərbaycan üçün iqtisadi dividentləri barədə Crossmedia.az-a da Milli Məclisin dörd çağırış deputatı, iqtisad elmləri doktoru, professor Rüfət Quliyev bildirib ki, Orta Dəhliz iki qitə arasında strateji nəqliyyat marşrutudur və təbii ki, bu yol Azərbaycan ərazisindən keçəcək: “Bu, həm region ölkələri, həm də geniş coğrafiyada yerləşən dövlətlər üçün olduqca mühüm əhəmiyyət daşıyır. Azərbaycanın bu layihədən əhəmiyyətli dərəcədə qazanc əldə edəcəyi şübhəsizdir. Söhbət kifayət qədər böyük rəqəmlərdən on milyonlarla ton yükdaşımadan gedir. Hesab edirəm ki, bu prosesin ən önəmli tərəfi qeyri-neft sektorunun sıçrayışlı inkişafıdır. Eyni zamanda bu layihə gələcəkdə Azərbaycan üçün valyuta axınının əsas mənbələrindən birinə çevrilə bilər”.
Deputatın sözlərinə görə, hazırda nəqliyyat və kommunikasiya sahəsində həyata keçirilən bütün layihələr olduqca perspektivlidir. Bu baxımdan həm yaxın, həm də uzaq qonşularımızın bu marşruta maraqlı olması təsadüfi deyil: “Onların bir qismi ixrac, digərləri isə idxal imkanlarını artırmaq istəyir. Məsələn, ixracla daha çox məşğul olan ölkələr Çin və Hindistandırsa, idxalda əsas rol Avropa ölkələrinin payına düşür. Qardaş Türkiyənin də bu layihədə ciddi maraqları var. Orta Dəhliz bu mənada ən uğurlu logistik layihələrdən biridir. Azərbaycan bu marşrut üzərindən inkişaf edir və addım-addım bu imkanlardan düzgün şəkildə istifadə etmək üçün möhkəm təməl formalaşdırır. Gələcəkdə isə bu yol regionun nəhəng logistik arteriyasına çevriləcək”.
Həmayıl
16:47 06.08.2025
Oxunuş sayı: 970
