Müəllimlərin maaşı artır? — Təkliflər Nazirliyə təqdim olunub
Təhsilin keyfiyyətini yüksəltmək və müəllimlərin peşəkar inkişafını dəstəkləmək məqsədilə həyata keçirilən sertifikatlaşdırma prosesi son illərdə mühüm əhəmiyyət kəsb edir. Bu sistem, müəllimlərin bilik və bacarıqlarını qiymətləndirməklə yanaşı, onların əməkhaqqısına da diferensial yanaşmanı təmin edir.
Qeyd edək ki, bu ilki sertifikatlaşdırma prosesindən sonra maaşını diferensial qaydada artımla alacaq müəllimlərin sayı təxminən 70 min nəfərdən çox olacağı gözlənilir. Sertifikatlaşdırma prosesinin nəticələri göstərir ki, qarşıya qoyulan hədəflərə uğurla nail olunur. Peşəkar müəllim keyfiyyətli təhsilin əsasını təşkil edir və bu sistem məhz bu məqsədə xidmət edir.
Mövzu ilə bağlı Crossmedia.az-a açıqlama verən Milli Məclisin deputatı Vüqar Bayramov bildirib ki, müəllimlərin maaşlarının sertifikasiya nəticəsində artırılması ilə bağlı təkliflər həm Milli Məclisə, həm də Elm və Təhsil Nazirliyinə rəsmi olaraq təqdim edilib:
“Mövcud qaydalara əsasən, 51 və daha çox bal toplayan müəllimlərin əmək haqqı 35%, 30-51 bal arası nəticə göstərən müəllimlərin əmək haqqı isə 10% artır. Biz təklif edirik ki, 48 və daha yüksək bal yığmış müəllimlər üçün maaş artımı 35% hesablansın. Mövcud Kembric qiymətləndirmə praktikasına əsasən, 80 və daha yüksək bal toplamış müəllimlərin maaşlarının daha yüksək artırılması məqsədəuyğundur. 30-48 bal arasında nəticə göstərən müəllimlər üçün isə differensial artımın tətbiq olunmasını təklif edirik. Bu halda, differensial artımdan istifadə olunması mümkündür və 30-48 bal arası müəllimlər üçün yalnız 10% deyil, differensial faizlərdən istifadə edilməsi daha məqsədəuyğundur. Bütün bunlar əmək haqqının daha yaxşı dəyərləndirilməsi, müəllimlərimizin əmək haqlarında daha yüksək artımların həyata keçirilməsi baxımından vacibdir. Bunla bağlı təkliflərimizi qeyd etdiyim kimi, həm Milli Məclisə, həm də Elm və Təhsil Nazirliyinə rəsmi olaraq təqdim olunub.”
Nəzrin Salmanova
18:50 14.06.2025
Oxunuş sayı: 1144
