Müharibə vaxtı saxta məlumatlar, dezinformasiyalar yayılır - NƏ ETMƏLİ?
İran və İsrail arasında artan gərginlik yalnız hərbi meydanla məhdudlaşmayıb, informasiya məkanına da sıçradı. Bu qarşıdurma fonunda Azərbaycana qarşı məqsədli dezinformasiya kampaniyalarının geniş vüsət alması narahatlıq doğurur. Sosial şəbəkələrdə və bəzi xarici media resurslarında Azərbaycanın guya bu münaqişədə birbaşa iştirak etdiyi və hərbi dəstək verdiyi barədə yayılan saxta məlumatlar informasiya təhlükəsizliyimizə yönəlmiş açıq təhdidlərdir. Bu cür manipulyativ xəbərlərin məqsədi ölkəmizi regional qarşıdurmalara cəlb etmək, daxili sabitliyi sarsıtmaq və ictimai rəyi çaşdırmaqdır. Belə bir şəraitdə vətəndaşların bu cür təxribat xarakterli informasiyalardan qorunması, etibarlı mənbələrə istinad etməsi və informasiya savadlılığının artırılması hər zamankından daha vacib məsələdir.
Mövzu ilə bağlı professor Qulu Məhərrəmli Crossmedia.az-a açıqlama verib: "Müharibə vaxtı yalan və saxta məlumatların, dezinformasiyaların yayılması çox təbiidir. Çünki bu müharibənin başqa bir üsulla, məntiqi davamıdır.
Ona görə də indi İsrail-İran qarşıdurmasında Azərbaycan əleyhinə yayılan məlumatlara müəyyən mənada təbii baxmaq lazımdır. Çox təəssüf edirik ki, bu məlumatlar əsasən iki mənbədən yayımlanır: İrandan və Rusiya mənbələrindən. Burada hətta müəyyən dərəcədə bir-birilərini tamamlama üslubu da görünür. Vətəndaşlarımız baş verən proseslərin mahiyyətini anlamalı və bu cür saxta xəbərlərə hazırlıqlı olmalıdır. Siyasi savadlılıq önəmli deyil amma informasiyanı tanımaq çox önəmlidir. Ona görə rəsmi məlumatlara, aparıcı informasiya agentliklərinin məlumatlarına diqqət yetirilməlidirlər. İran tərəfindən yayılan dezinformasiyalara qətiyyən diqqət edilməməlidir".
Ayhan Ağarzayev
17:08 14.06.2025
Oxunuş sayı: 1158
