Deputat: "Bu istiqamətdə daha strateji və dərin əməkdaşlıq davam etdiriləcək”
Türkiyə Prezidenti Rəcəb Tayyib Ərdoğan Azərbaycanla Türkiyə arasında enerji sahəsində mövcud olan strateji əməkdaşlığın əhəmiyyətini bir daha vurğulayıb. O, qeyd edib ki, hər iki ölkə Avropanın enerji təhlükəsizliyi baxımından mühüm strateji rol oynayır və bu əməkdaşlıq digər sahələrdə olduğu kimi, enerji sahəsində də güclü və qətiyyətli şəkildə davam etdirilir. Prezident Ərdoğan Türkiyə və Azərbaycanın enerji sektorunda bir çox mühüm layihələrə imza atdığını bildirərək, Bakı-Tbilisi-Ceyhan və Bakı-Tbilisi-Ərzurum boru kəmərlərinin yalnız bu iki ölkə üçün deyil, bütövlükdə region və Avropa üçün də enerji təhlükəsizliyi baxımından ciddi töhfə verdiyini xüsusi vurğulamışdır. O, həmçinin İğdır-Naxçıvan boru kəmərini iki qardaş ölkə arasında enerji əməkdaşlığının ən yeni və əhəmiyyətli nümunəsi kimi təqdim etmişdir.
Mövzuyla bağlı Milli Məclisin deputatı Vüqar Bayramov Crossmedia.az-a açıqlama verib:
“Azərbaycanla Türkiyə regionda enerji və nəqliyyat layihələrinin reallaşmasına töhfə verən ölkələrdir. Nəzərə alsaq ki, Azərbaycan nefti eləcə də qazı Türkiyə vasitəsilə Avropa bazarına çıxarılır və iki ölkə xarici siyasətdə strateji əməkdaşlığa malikdir. Həm Azərbaycan həm də Türkiyənin Avropa və bütövlükdə regionun enerji təhlükəsizliyindəki rolu da yüksəlməkdədir və dərinləşən strateji əməkdaşlıq regionun təhlükəsizliyinin formalaşmasına xüsusi töhfə verir. Bakı-Tiblisi-Ceyhan, Bakı-Tiblisi-Ərzurum boru kəməri eləcə də cənub qaz dəhlizi kimi layihələr Azərbaycan-Türkiyə əməkdaşlığının uğurlu layihələridir. Ölkələr getdikcə əməkdaşlığı gücləndirir və son enerji forumu göstərir ki, bu istiqamətdə daha strateji və dərin əməkdaşlıq davam etdiriləcək”.
Ayhan Ağarzayev
16:06 02.06.2025
Oxunuş sayı: 1657
