Pakistan təşəkkür edir: Bakı, Ankara və Pekin çətin günlərdə yanımızda idi
Pakistanın nüfuzlu “Pakistan Observer” qəzeti ölkənin etibarlı müttəfiqlərinə həsr olunmuş baş məqalə dərc edib.
Crossmedia.az-ın məlumatına görə, məqalədə qeyd olunur ki, Hindistanla yaşanan son gərginlik zamanı dünyanın bir çox ölkəsinin Pakistanın mövqeyini və özünümüdafiə hüququnu açıq və ya dolayı şəkildə dəstəkləməsi İslamabad üçün həm diplomatik uğur, həm də ilham mənbəyidir.
Bildirilib ki, Pakistan xalqı heç zaman unutmur: Hindistan təhlükəsizlik və suverenliyini təhdid etdiyi bir vaxtda bəzi strateji tərəfdaşlar – Azərbaycan, Türkiyə və Çin – ölkənin yanında sarsılmaz şəkildə dayanıb.
Qəzet yazır ki, baş nazir Şahbaz Şərifin təşəkkür səfərləri çərçivəsində Türkiyə, Azərbaycan və İrana baş çəkmək qərarı, Pakistanın bu ölkələrlə dərin dostluq münasibətlərinin göstəricisidir.
Məqalədə vurğulanır ki, Türkiyə hər zaman Pakistanın yanında olub və xüsusilə Kəşmir məsələsində qətiyyətli dəstək nümayiş etdirib. Son gərginlik fonunda Hindistan ictimaiyyətinin Türkiyəyə qarşı sanksiya çağırışları və boykot qərarları da bu həmrəyliyə cavab kimi qiymətləndirilir.
Çinlə bağlı qeyd olunur ki, böhran Pekin–İslamabad strateji tərəfdaşlığının nə qədər sarsılmaz və effektiv olduğunu bir daha göstərdi və iki ölkənin bu münasibətləri daha da gücləndirmək əzmində olduqları vurğulanıb.
21:46 27.05.2025
Oxunuş sayı: 9091
