Gürcüstan Azərbaycanla təmaslara çox ciddi önəm verir - AÇIQLAMA
Azərbaycan və Gürcüstan arasında münasibətlər qədim tarixə əsaslanır. Bu münasibətlər çoxəsrlik dostluq ənənələri üzərində qurulub. İki ölkə arasında sıx mədəni, iqtisadi və siyasi əlaqələr mövcuddur. Tarix boyu iki xalq bir çox çətinliklərə qarşı birlikdə mübarizə aparıb və bir-birinin müstəqilliyini dəstəkləyib.
Gürcüstan Prezidenti Mixeil Kavelaşvilinin aprelin 15-də Azərbaycana ilk xarici səfərini etməsi, məhz Azərbaycan və Gürcüstan dostluq əlaqələrinin başlıca sübutudur. Bütün bunlar Azərbaycan-Gürcüstan arasında möhkəm dostluq bağlarının davam etməsi və gələcəkdə daha da inkişaf etməsi üçün mühüm zəmin yaradır.
Mövzu ilə bağlı Crossmedia.az-a açıqlama verən politoloq Arzuman Abdulkərimov bildirib ki, son dövrlər Azərbaycan-Gürcüstan münasibətləri inkişaf edir: “Artıq ikitərəfli gediş-gəlişlər, təmaslar həm dövlət başçıları səviyyəsində, eyni zamanda parlamentlər səviyyəsində çox güclü inkişaf etməkdədir. Bu baxımdan da Gürcüstan Prezidentinin Azərbaycana səfəri çox diqqətəlayiqdir və mən bu səfəri yüksək qiymətləndirirəm. Burada bir nüans da var ki, Gürcüstan Prezidenti seçildikdən sonra ilk xarici rəsmi dövlət səfərini Azərbaycana edib. Bu onun göstəricisidir ki, Gürcüstan dövləti Azərbaycanla təmaslara çox ciddi önəm verir. Hesab edirəm ki, bu təmaslar Gürcüstan üçün çox vacibdir. Digər məsələ ondan ibarətdir ki, Gürcüstan Baş Naziri də bir neçə dəfə Azərbaycana səfər edib. Eyni zamanda, Antalyada keçirilən diplomatik forumda cənab Prezidentlə görüşməsi də diqqətəlayiqdir. Bildiyimiz kimi, Gürcüstanın Baş Naziri bir neçə dəfə Azərbaycan Prezidenti haqqında çox yüksək fikirlər söyləyib və İlham Əliyevdən öyrənə biləcəkləri çox şey olduğunu dilə gətirib”.
Politoloqun sözlərinə görə, son dövrlər Gürcüstanla Azərbaycan bəzi Avropa və Qərb dövlətlərinin ikili yanaşma standartlarından əziyyət çəkir: “Gürcüstanda baş verən son parlament, baş nazir və prezident seçkiləri çox qalmaqallı şəraitdə keçirilib. Orada müxalifətin açıq şəkildə Avropadan və Qərb təsisatlarından dəstək alması görünürdü. Bu, Qərb dövlətləri və beynəlxalq təşkilatların Gürcüstanın daxili işlərinə qarışdığını göstərir. Azərbaycanda da oxşar problemlər mövcuddur. Bir neçə il öncə Azərbaycan Qarabağ üzərində qələbə çalmamışdan əvvəl Gürcüstan kimi separatizmdən əziyyət çəkirdi. Bu problemlər bizi birləşdirib. Şükürlər olsun ki, Azərbaycan bu məsələni həll etdi, öz torpaqları üzərində suverenliyini bərpa etdi. Lakin təəssüflər olsun ki, Gürcüstan hələ də separatizmdən əziyyət çəkir və onun əraziləri bəzi qüvvələrin dəstəyi ilə işğal altında saxlanmaqdadır. Fikrimcə, Gürcüstan tərəfi də Azərbaycanın bu təcrübəsindən yararlanmağa çalışır və bu təmasları Gürcüstan üçün daha vacib hesab edirəm. Digər məqam, Azərbaycandan dünyaya çıxan həm qaz, həm də neft xətlərinin, eyni zamanda Poti terminalı üzərindən Azərbaycan neft və qaz məhsullarının dünya bazarlarına çıxarılması məsələsidir. Azərbaycan bu məsələdə Gürcüstan tərəfinə çox ciddi tranzit xərcləri ödəyir və bu, Gürcüstan iqtisadiyyatına ciddi təsir edir. Bu kimi məsələlər bizə deməyə əsas verir ki, ikitərəfli münasibətlərin inkişafı, hər iki ölkənin gələcək inkişafı və perspektivlərin genişləndirilməsi üçün çox vacibdir”.
Nəzrin Salmanova
18:55 17.04.2025
Oxunuş sayı: 23455
