Ukraynalıların yarısı ərazi güzəştlərini müharibənin dayandırılması müqabilində qəbuledilməz hesab edir
Ukraynalıların yarısı ərazi güzəştlərini və NATO-ya üzvlükdən imtinanı müharibənin dayandırılması müqabilində tamamilə qəbuledilməz hesab edir.
Crossmedia.az xəbər verir ki, Kyiv Independent-in sifarişi ilə Kyiv Beynəlxalq Sosiologiya İnstitutunun (KIIS) keçirdiyi sorğuya əsasən, ukraynalıların 47,1%-i müharibənin dayandırılması üçün ərazi güzəştlərinə və NATO üzvlüyündən imtinaya razı olmağı tamamilə qəbuledilməz hesab edir.
Sorğuda iştirak edənlərin yalnız 8,2%-i bu ssenariyə "asanlıqla razı ola biləcəyini" bildirib, 38,1%-i isə bu seçimi çətin, lakin "ümumiyyətlə qəbuledilən" kimi dəyərləndirib.
Respondentlərin 6,2%-i suala cavab verməkdə çətinlik çəkib, 0,4%-i isə ümumiyyətlə cavab verməkdən imtina edib.
18-29 yaş qruplarında respondentlərin 50%-dən çoxu ərazi güzəştlərini və NATO üzvlüyündən imtinanı müharibənin dayandırılması müqabilində tamamilə qəbuledilməz hesab edir. Ukraynanın şərqində isə 49,5% bu variantı çətin, lakin "ümumiyyətlə qəbuledilən" kimi qiymətləndirib.
Kyiv Independent-in sifarişi ilə aparılan sorğu 5 fevral - 10 mart tarixləri arasında keçirilib. Ümumilikdə 2 029 nəfər iştirak edib və sorğunun maksimal xəta payı 2,4% təşkil edir.
Martın 10-da ABŞ-ın dövlət katibi Marko Rubio Kiyevin Rusiya ilə müharibəni dayandırmaq üçün ərazi güzəştlərinə getməli olacağını bəyan edib. Ukrayna Xarici İşlər Nazirliyi isə bildirib ki, Vaşinqton tərəfindən ölkəyə rəsmi şəkildə belə bir təklif edilməyib.
NATO üzvlüyü məsələsi də getdikcə daha əlçatmaz görünür. "Siz NATO üzvlüyünü unuda bilərsiniz", – ABŞ Prezidenti Donald Tramp daha əvvəl bildirmişdi.
Hazırda Rusiya qüvvələri Ukrayna ərazisinin təxminən 20%-ni nəzarətdə saxlayır. Rusiyanın işğalı altında olan Ukrayna əhalisi isə sistemli repressiyalar, işgəncələr və zorakılıqlara məruz qalır.
Nabat Fərzəliyeva
11:25 13.03.2025
Oxunuş sayı: 2665
