Pakistan təhlükəsizlik qüvvələri girovları azad etmək üçün əməliyyatı davam etdirir
Pakistanın təhlükəsizlik qüvvələri silahlılar tərəfindən girov götürülən qatarın ən azı 155 sərnişinini azad edib, təxminən 30 ekstremisti zərərsizləşdirib. Bu barədə Geo TV telekanalı hüquq-mühafizə orqanlarındakı mənbələrə istinadən məlumat yayıb.
Crossmedia.az xarici mediaya istinadən xəbər verir ki, hücum zamanı qatarda 450-yə yaxın sərnişin olub. Hazırda qalan girovların azad edilməsi üçün əməliyyat davam edir. Ekstremistlərin dəqiq sayı bilinmir.
Bildirilir ki, silahlılar qatarı Əfqanıstan və İran sərhədinə yaxın ucqar bir bölgəyə aparıblar. Xüsusi əməliyyat başladıqdan sonra onlar kiçik qruplara ayrılıb. Təhlükəsizlik strukturlarındakı mənbələrin məlumatına görə, ekstremistlər peyk telefonlarından istifadə edərək Əfqanıstanda olduğu ehtimal edilən təşkilatçıları ilə əlaqə saxlayırlar.
Əməliyyat silahlıların girovlardan "canlı qalxan" kimi istifadə etməsi səbəbindən çətinliklə davam edir.
Zeynəb Yunuszadə
13:45 12.03.2025
Oxunuş sayı: 8853
