Astanada 20 Yanvar faciəsinin ildönümünə həsr olunmuş anım mərasimi təşkil edilib
Azərbaycan Respublikasının Astanadakı səfirliyində diaspor nümayəndələrinin iştirakı ilə 20 Yanvar faciəsinin ildönümünə həsr olunmuş anım mərasimi keçirilib.
Crossmedia.az xəbər verir ki, əvvəlcə səfirlikdə yerləşən Ümummilli Lider Heydər Əliyevin büstü önünə gül dəstələri qoyulub, şəhidlərin ruhu bir dəqiqəlik sükutla yad edilib, həmçinin şəhidlərin xatirəsinə həsr olunmuş stendin önünə güllər düzülüb.
Səfir Ağalar Atamoğlanov çıxışında 20 Yanvar gününün Azərbaycan xalqının tarixinin həm faciəli, kədərli, həm də qəhrəmanlıq və rəşadət səhifəsi və qürur tarixi olduğunu qeyd edib.
Ötən əsrin 80-ci illərində Ermənistanın Azərbaycana qarşı əsassız ərazi iddialarının davam etdirilməsini, habelə azərbaycanlıların indiki Ermənistan ərazilərindəki tarixi yurdlarından kütləvi deportasiyasını əsaslandırmaq naminə "Sumqayıt hadisələri" kimi qondarma təxribatları hazırlanıb törədildiyi bir dövrdə keçmiş sovet hakimiyyətinin ölkəmizə və xalqımıza qarşı ayrı-seçkilik siyasəti Azərbaycan xalqının milli azadlıq hərəkatının yüksəlişinə gətirib çıxardığını diqqətə çatdırılıb.
Səfir qeyd edib ki, dövrün mürəkkəbliyinə, keçmiş sovet hakimiyyətinin 20 Yanvar həqiqətlərinin yayılmasının qarşısını almaq istiqamətində gördüyü tədbirlərə baxmayaraq, qanlı Yanvar faciəsinə dövlət səviyyəsində tam siyasi-hüquqi qiymət verilməsi məsələsi Ümummilli Lider Heydər Əliyevin sayəsində həllini tapıb. Faciənin ertəsi günü - yanvarın 21-də Heydər Əliyev öz yaxınları ilə birlikdə Azərbaycanın Moskvadakı daimi nümayəndəliyinə gələrək xalqla birgə olduğunu bəyan edib.
Əlavə olunub ki, yalnız Heydər Əliyevin ölkə rəhbərliyinə qayıdışından sonra 20 Yanvar hadisələrinin hüquqi müstəvidə əsl mahiyyəti açıqlanıb, şəhidlərin xatirəsi əbədiləşdirilib və şəhid ailələrinin, 20 Yanvar hadisələrində əlil olan şəxslərin sosial müdafiəsi gücləndirilib.
Səfir nəzərə çatdırıb ki, 20 Yanvar xalqımızın ən çətin günlərdən və tarixin ən mürəkkəb sınaqlarından çıxan birliyi və iradəsi, Müzəffər Ali Baş Komandanın rəhbərlik etdiyi Şanlı Azərbaycan Ordusunun 44 günlük Vətən müharibəsində ərazi bütövlüyümüzün təmini ilə nəticələnən parlaq zəfərinin, habelə 19-20 sentyabr 2023-cü ildə suverenliyimizin tam bərpasına gətirib çıxaran antiterror əməliyyatları ilə işğal və münaqişəyə son qoyulmasının əsasını təşkil etdi.
Çıxışda Azərbaycanın bugünkü inkişafı haqqında da iştirakçılara məlumat verilib.
Bildirilib ki, Prezident, Müzəffər Ali Baş Komandan İlham Əliyevin rəhbərliyi ilə Şanlı Azərbaycan Ordusu xalqımızın 30 illik həsrətinə son qoyub, torpaqlarımızın erməni işğalından azad edilməsi ilə bölgədə yeni reallıqlar yaranıb.
Azərbaycan ilə Qazaxıstan arasında münasibətlərin yüksələn xətlə inkişaf etdiyi, bu münasibətlərin strateji tərəfdaşlıq və müttəfiqlik səviyyəsində olduğu bildirilib. Müxtəlif millətlərin nümayəndələrinin sülh və əmin-amanlıq şəraitində yaşadığı Qazaxıstanın inkişafına soydaşlarımızın öz töhfələrini verdikləri, onların ölkə həyatının müxtəlif sahələrində fəaliyyət göstərdikləri diqqətə çatdırılıb.
Həmçinin, 25 dekabrda AZAL-a məxsus sərnişin təyyarəsinin Aktau şəhəri yaxınlığında qəzaya uğraması ilə bağlı Qazaxıstanın aidiyyəti qurumlarının, həmçinin sadə vətəndaşlarının dərhal köməyə gəlməsinin xalqlarımız arasında qardaşlıq bağlarının tək sözdə deyil, əməldə də öz təsdiqini tapdığı vurğulanıb.
Öz növbəsində, diaspor nümayəndələri Mahir Rzayev və Səyyaf İsmayılov çıxış edərək səfirin fikirlərini bölüşüb, Azərbaycanın dövlət müstəqilliyinin əldə olunması və qorunub saxlanılmasında Ümummilli Lider Heydər Əliyevin misilsiz xidmətləri olduğunu qeyd edib, həmçinin Prezident İlham Əliyevin apardığı daxili və xarici siyasətə hərtərəfli dəstək göstərdiklərini bildiriblər.
Tədbir çərçivəsində təşkil olunmuş sərgidə iştirakçılar 20 Yanvar hadisələrini əks etdirən foto-ekspozisiya ilə tanış olublar.
Qeyd edək ki, 20 Yanvar faciəsini əks etdirən materiallar qazax dilində hazırlanaraq yerli media və səfirliyin sosial şəbəkələrində yerləşdirilmiş, Qazaxıstanın dövlət qəzeti "Eqemen Qazaqstan"da müvafiq məqalə dərc olunub.
16:26 20.01.2025
Oxunuş sayı: 7483
