Azərbaycan-Ermənistan sərhədinin şimaldan cənuba delimitasiyası başlayır
2025-ci il yanvarın 16-da Azərbaycan və Ermənistan arasında sərhəd məsələlərinin həlli üzrə komissiyaların növbəti - on birinci görüşü keçirilib. Görüşdə Azərbaycan Baş nazirinin müavini Şahin Mustafayev və Ermənistan Baş nazirinin müavini Mher Qriqoryan iştirak edib. Tərəflər sərhədin delimitasiyası işlərinin başlanması, sərhəd xəttinin ardıcıllığı və təlimatların hazırlanması ilə bağlı mühüm razılıqlar əldə ediblər. Görüşdə delimitasiya işlərinin Azərbaycan, Ermənistan və Gürcüstan sərhədlərinin qovuşma nöqtəsindən başlayaraq şimaldan cənuba doğru davam etdirilməsi qərarlaşdırılıb.
Mövzu ilə bağlı Crossmedia.az-a danışan politoloq Hüseyn İbrahimov bildirib ki, keçirilən görüşlərdən bəziləri uğurlu nəticələrə gətirib çıxarmasa da, ümumilikdə müəyyən irəliləyişlərlə yadda qalıb. Xüsusən də, Azərbaycana məxsus tarixi ərazilərin bir qisminin sərhədlər daxilinə qaytarılması məsələsində müsbət addımlar atılıb.
Politoloq qeyd edib ki, keçirilən son görüş sadəcə yeni bir addım deyil, delimitasiya prosesində daha geniş bir ərazinin sərhədlərinin müəyyənləşdirilməsi üçün əhəmiyyətli müzakirə mövzusu olub. Lakin sərhədlərin dəqiq müəyyənləşdirilməsi ilə bağlı ilkin razılıq indiyədək əldə edilməyib. Buna baxmayaraq, bu görüşün regionda sabitliyin təmin edilməsində mühüm rol oynaya biləcəyi vurğulanır. Hüseyn İbrahimov bu görüşü gələcəkdə bağlanacaq sülh müqaviləsinin bir tərkib hissəsi kimi də dəyərləndirib.
Politoloq əlavə edib ki, bəzən post-müharibə dövründə sərhədlərin delimitasiyası məsələsi sülh müqaviləsindən əvvəl müzakirə edilir. Ermənistanın sülh müqaviləsinin imzalanmasına mane olan xarici amillərin mövcudluğu göstərir ki, tərəflər arasında hələ də ciddi çətinliklər var.
“Əgər Ermənistan keçirilən 11-ci görüşü gələcəkdə sülh və sabitlik üçün bir preambula, yəni giriş hesab edərsə, bu, regionda sabitliyin təmin olunmasına daha əhəmiyyətli təsirlər göstərə bilər” – deyə politoloq vurğulayıb. Onun sözlərinə görə, prosesin iki tərəfli çərçivədə davam etməsi daha sabit və uğurlu nəticələrə gətirib çıxara bilər.
Bununla yanaşı, politoloq Ermənistanın daxili siyasi qüvvələrinin bu anlaşmalara qarşı olduğunu və onların müxtəlif mənbələrdən dəstək aldığını da bildirib. “Bu qüvvələrin təsiri zəif deyil və prosesə ciddi şəkildə təsir göstərmək potensialına malikdir. Ermənistanın sülh müqaviləsinə gəlməsi üçün daxili referenduma ehtiyac ola bilər. Bu da Ermənistan hökumətini və müvafiq qurumları ehtiyatlı davranmağa məcbur edir,” – deyə Hüseyn İbrahimov əlavə edib.
Beləliklə, sərhədlərin delimitasiyası üzrə aparılan son görüşlərin sülh müqaviləsi və regionda sabitliyin təmin olunması baxımından əhəmiyyətli olduğu vurğulanır.
Nihat Tahirov
07:51 18.01.2025
Oxunuş sayı: 15510
