Multikulturalizm Mərkəzində 20 Yanvar faciəsi qurbanlarının xatirəsi anılıb
Yanvarın 17-də Bakı Beynəlxalq Multikulturalizm Mərkəzində 20 Yanvar - Ümumxalq Hüzn Gününə həsr edilən tədbir keçirilib.
Crossmedia.az Mərkəzin mətbuat xidmətinə istinadən xəbər verir ki, ölkəmizdəki dini və milli icmaların nümayəndələrinin iştirak etdikləri tədbirdə əvvəl Dövlət Himni səsləndirilib, Vətən uğrunda canlarından keçən şəhidlərimizin əziz xatirəsi bir dəqiqəlik sükutla yad edilib.
Tədbiri giriş sözü ilə açan Bakı Beynəlxalq Multikulturalizm Mərkəzinin icraçı direktoru Rəvan Həsənov 20 Yanvar faciəsinin Azərbaycan tarixinin hüznlü, eyni zamanda, şərəfli səhifələrindən biri olduğunu qeyd edib.
20 Yanvar faciəsinə yol açan siyasi səbəblərdən danışan icraçı direktor diqqətə çatdırıb ki, Azərbaycan xalqı bu hadisə nəticəsində çoxlu sayda şəhid versə də onun iradəsi sınmadı və milli ruhu sarsılmadı. “Həmin qırğın zamanı ümummilli mənafelərin müdafiəsi naminə canlarından keçmiş və şəhidlik zirvəsinə ucalmış Vətən övladları misilsiz fədakarlıqları ilə xalqımızın qəhrəmanlıq salnaməsinə parlaq səhifə yazdılar. Azərbaycan xalqı bu mübariz oğul və qızlarının şücaətini daim yüksək qiymətləndirir, onların ruhuna ehtiram göstərir, xatirəsini hər zaman uca tutur”,- deyə R.Həsənov əlavə edib.
20 Yanvar hadisələrinin Azərbaycan xalqının demokratiya və milli azadlıq uğrunda mübarizəsini boğmaq, xalqa mənəvi zərbə vurmaq məqsədilə gerçəkləşdirildiyini deyən Milli Məclisin deputatı Ceyhun Məmmədov vurğulayıb ki, buna baxmayaraq, xalqımız Vətənin suverenliyi və bölünməzliyi uğrunda möhkəm dayandı.
Qafqaz Müsəlmanları İdarəsinin sədr müavini Fuad Nurullayev 20 Yanvarda və sonrakı günlərdə şahidi olduğu acı gerçəklərlə bağlı xatirələrini bölüşüb.
Tədbirdə Azərbaycandakı Dağ Yəhudiləri İcmasının rəhbəri Milix Yevdayev, Rus Pravoslav Kilsəsinin Bakı və Azərbaycan Yeparxiyasının yepiskopu Aleksiy Smirnov, Roma Katolik Kilsəsinin Azərbaycandakı ordinarisi Vladimr Fekete, Avropa Yəhudilərinin Bakı Dini İcmasının baş ravvini Şneor Seqal, Azərbaycandakı Alban-Udi Xristian Dini İcmasının sədri Robert Mobili, Dini Qurumlarla İş üzrə Dövlət Komitəsinin Dinşünaslıq ekspertizası şöbəsinin müdiri Nahid Məmmədov, Azərbaycan İlahiyyat İnstitutunun Dinşünaslıq kafedrasının müdiri, dosent Anar Qafarov, Azərbaycanın Rus İcması sədrinin birinci müavini Anastasiya Lavrina və “Samur” Ləzgi Mərkəzinin sədri İmran Rzayev 20 Yanvarın Azərbaycan xalqının qəhrəmanlıq tarixi olduğunu diqqətə çatdırıblar.
12:04 17.01.2025
Oxunuş sayı: 12759
