BakıKartla bağlı nə baş verir? - İstifadəçilər narazıdır
Müştərilərin texniki xəta səbəbindən hesablarından vəsait çıxılması ilə bağlı narahatlıqları son günlər geniş müzakirələrə səbəb olub. Belə ki, sərnişinlərin gediş haqqı olaraq ödədikləri 50 qəpik balanslarına geri qaytarılıb. Bundan sonra Kapital Bank texniki xətanı anlayaraq birdən – birə sərnişinlərin bank kartından müəyyən period üçün qaytarılmış məbləği birdəfəlik məxaric edib. Bu, insanlar arasında ciddi ajiotaj və narazılıq yaradıb. Kapital Bank və hüquq mütəxəssisləri mövzu ilə bağlı açıqlamalar verərək, məsələyə aydınlıq gətiriblər.
Kapital Bankın İctimaiyyətlə Əlaqələr Şöbəsinin müdiri Arzu Əliyevanın Crossmedia.az-a verdiyi açıqlamada bildirilir ki, Bakı və Abşeron ərazisində metro və avtobuslardan istifadə zamanı BakıKart QR biletləri vasitəsilə ödənişlər fiziki kart olmadan da asanlıqla həyata keçirilə bilir: “Bunun üçün Birbank mobil tətbiqində QR bilet yaratmaq kifayətdir. Lakin noyabr ayında texniki xəta səbəbindən həm istifadə edilməyən, həm də istifadə edilmiş biletlərin məbləğləri müştərilərin hesablarına geri qaytarılıb.
Əliyeva qeyd edib ki, bank əvvəlcədən müştərilərə SMS bildiriş göndərib və yanvarın 10-dək texniki xəta nəticəsində artıq ödənilmiş məbləğlərin geri alınacağı bildirilib: “Sözügedən dövrdə müştərilərdən sorğular daxil olub, bunlar araşdırılıb və müştərilərə hərtərəfli məlumat verilib. Heç bir halda müştərinin balansından təyinata uyğun olmayan vəsaitin silinməsi baş verməyib. Gələcəkdə bu kimi halların yaşanmaması üçün təkmilləşdirilmə işləri görülüb və yeni API servisi istifadəyə verilib."
Bankın açıqlamasında vurğulanır ki, müştərilərin hüquqlarının qorunması daim diqqətdə saxlanılır və bankın təqsiri nəticəsində dəyən zərərlər bərpa edilir.
Məsələ ilə bağlı hüquqşünas Yalçın Hacızadə də fikirlərini bölüşərək bank-müştəri münasibətlərində qanunvericiliyin tələblərinə diqqət çəkib:
"Banklar göstərdikləri xidmətlərin təhlükəsizliyini təmin etməyə borcludurlar. Əgər yaranan texniki xəta müştərilərə maddi və ya mənəvi zərər vurarsa, müştərilər bununla bağlı Mərkəzi Banka və ya məhkəməyə müraciət edə bilərlər."
Y.Hacızadə, həmçinin müştərilərə müqavilə şərtlərini diqqətlə oxumağı tövsiyə edir: "Bu cür hallarda müştərilər müqavilədə göstərilən qaydaları nəzərdən keçirməli və bankın onlara qarşı öhdəliklərini başa düşməlidirlər. Texniki xətalar qaçınılmaz olsa da, onların tez bir zamanda aradan qaldırılması və müştərilərin məlumatlandırılması bankın əsas vəzifəsidir."
Məsələ həmçinin ictimaiyyətdə bankların xidmətlərinin səmərəliliyinə və təhlükəsizliyinə dair suallar doğurub. Kapital Bank bu hadisənin baş verməməsi üçün tədbirlər gördüyünü bildirsə də, ekspertlər müştərilərin bu cür hallarda öz hüquqlarını qorumaq üçün daha məlumatlı olmasını vacib sayır.
Bank və müştəri arasındakı əlaqələrin hüquqi və texniki çərçivədə davam etdirilməsi üçün həm bank, həm də müştərilər öz öhdəliklərini yerinə yetirməlidirlər. Bu hadisə müştərilərə bank xidmətlərindən istifadə zamanı hüquqlarını bilmək zərurətini bir daha xatırladır.
Sevinc Abuşova
12:27 16.01.2025
Oxunuş sayı: 16082
