Avropa
Ukrayna Rusiya ərazisini necə tutdu?- Putin öldürülə bilər
Rusiya-Ukrayna cəbhəsində artıq neçə vaxtdır ki, qanlı və üzücü mövqe savaşı davam edir. Nə Moskva tərəfi irəliləyərək qarşısına qoyduğu maksimum hədəflərə çata bilir, nə də Kiyev işğal olunmuş ərazilərini azad etmək üçün yetərli güc toplaya bilir. Hər iki tərəfin tükəndiyi və təcili "taym-aut"a, nəfəs almağa ehtiyac duyduğu bir şəraitdə diplomatik masada da tamamilə çıxılmaz durum yaranıb. Ukrayna Prezidenti Volodimir Zelenskinin mövcud təmas xətti boyunca atəşkəs təklifinə Kreml rəhbəri Vladimir Putinin "Donbası və Krımı rəsmən tanı" tələbi ilə cavab verməsi kompromis ehtimallarını sıfırlayır.
Çünki bu gün Putinin şərtlərini qəbul etmək Zelenski üçün siyasi intihar deməkdirsə, işğalı tamamlamadan atəşkəsə razılaşmaq da Putin üçün "sonun əvvəli" ola bilər. Hər iki liderin öz səhv strateji gedişləri ilə ölkələrini və özlərini saldıqları bu tarixi dalanı, cəbhədəki son vəziyyəti və gələcək ssenarilərini Crossmedia.az-a politoloq Əhəd Məmmədli şərh edib:
"Çünki hər iki tərəf artıq yorulub. Mövqe savaşı gedir: nə bu tərəf irəliləyə, nə də o tərəf öz torpaqlarını azad edə bilir. İndi ikisinə də taym-aut, nəfəs almaq lazımdır. Ukrayna "hərəmiz öz mövqeyimizdə qalaq, atəşkəs olsun" deyir və buna razıdır. Amma Putin razılaşmır. Putin "stavkaları" o qədər qaldırıb ki, "Donbası verməlisən və Krımla birlikdə rəsmən tanımalısan" tələbini irəli sürür. Buna da Zelenski gedə bilməz. Zelenski bu addımı atsa, xalqının qarşısında özünə siyasi "güllə çaxmış" olar. Adamdan soruşarlar ki, "beş ildir onda niyə bu qədər qan tökülürdü?'"
"Putinin "iştahı böyükdür", amma "tortu yeyə bilmir". Əvvəl "iştahı" SSRİ-ni qaytarmaq idi – "dişi qırıldı". Sonra Ukraynanı beş günə almaq istədi – beş gün oldu beş il. İndi də Donbas və Krımla məsələni bağlamaq istəyir. Zelenski buna getsə, siyasi ölümü olar. Amma Putinin də atəşkəsə razılaşması öz komandası içində onun "yeyilməsinə" gətirib çıxarar. Ona deyərlər ki, "bəs bu qırğın nə üçün idi? Atəşkəs olsa, Ukrayna yenidən güc yığacaq". Rusiya Konstitusiyasına görə Luqansk və Donetsk artıq onun ərazisidir. Məntiqlə, hazırda Ukrayna Rusiyanın ərazisini işğal altında saxlayır və Putin öz ərazisini belə azad edə bilməyib".
Əhəd Məmmədli hər iki liderin strategiyasızlığının yaratdığı tarixi fəsadları vurğulayaraq fikrini yekunlaşdırıb:
"Nəticədə tam bir dalan vəziyyəti yaranıb. Zelenskinin geri çəkilməsi siyasi ölümdür. Putində isə müharibəni istədiyi kimi minimum şərtlərlə də olsa qələbə ilə başa vura bilməmək gələcəkdə onun siyasi sonunun əvvəli olacaq. Vaxtı ilə Almaniya kansleri Adolf Hitler uduzmağa başlayanda cəbhələrdə ona qarşı sui-qəsd cəhdləri oldu. Eyni proseslər Putinin də başına gələ bilər və o, bunu gözəl bilir. Bu mənzərə göstərdi ki, nə Zelenski, nə də Putin güclü strateqdirlər. Hər ikisi öz siyasəti ilə ölkəsini dalana saldı. Ukraynanın vəziyyəti pisdir, amma Rusiyanın da vəziyyəti deyildiyi kimi yaxşı deyil – elə olsaydı, beş ilə Donbası tam işğal edib məsələni bitirərdilər".
Zeynəb Həsən
20:00 29.10.2026
Oxunuş sayı: 61
