“Volkswagen” 10 ilin ən böyük zərərini açıqlayıb
Almaniyanın avtomobil istehsalçısı “Volkswagen” 2026-cı ilin üçüncü rübündə 5,9 milyard avro əməliyyat zərəri ilə üzləşib. Bu, şirkətin 2015-ci ildəki “Dieselgate” qalmaqalından bəri qeydə aldığı ən böyük rüblük əməliyyat zərəridir.
Crossmedia.az xəbər verir ki, “Volkswagen” konserni bu barədə üçüncü rübün maliyyə nəticələrinə dair hesabatında məlumat yayıb.
Şirkətin maliyyə göstəricilərinin pisləşməsinə “Porsche” ilə bağlı aktivlərin dəyərinin azalması, Çin bazarında satışların zəifləməsi və artan rəqabət təsir göstərib.
Hesabata əsasən, üçüncü rübdə şirkətin satış gəlirləri ötən ilin eyni dövrü ilə müqayisədə 6,3 faiz azalaraq 75,3 milyard avroya düşüb.
Maliyyə nəticələrinə ümumilikdə 8,7 milyard avroluq xüsusi xərclər mənfi təsir göstərib. Bunun 6,4 milyard avrosu “Porsche” ilə bağlı dəyərsizləşmə itkilərinin payına düşüb.
“Volkswagen”in maliyyə direktoru Arno Antlits bildirib ki, şirkət fəaliyyətini təcili şəkildə yenidən təşkil etməli, xərcləri azaltmalı və səmərəliliyi artırmalıdır.
Bu məqsədlə konsernin 100 minədək iş yerinin ixtisarını və Almaniyada dördədək zavodun bağlanması ehtimalını əhatə edən restrukturizasiya planı gündəmdədir.
Şirkətin Çin bazarındakı mövqelərinin zəifləməsi, yerli avtomobil istehsalçılarının rəqabəti və elektrik avtomobillərinin daha aşağı mənfəətlilik səviyyəsi də maliyyə nəticələrinə təzyiq göstərir.
“Volkswagen” rəhbərliyi rentabelliyi bərpa etmək üçün istehsal xərclərinin azaldılmasını, idarəetmə strukturunun sadələşdirilməsini və yeni texnologiyaların tətbiqinin sürətləndirilməsini prioritet hesab edir.
18:10 29.10.2026
Oxunuş sayı: 54
