Rusiya aviaqəzada günahı olanları mütləq cəzalandırmalıdır
Azərbaycan Prezidenti İlham Əliyev AZAL-ın Aktauda baş vermiş aviasiya qəzası ilə bağlı mühüm açıqlamalar verib. Dövlət başçısı “Azərbaycan Hava Yolları” QSC-yə məxsus Bakı–Qroznı reysi ilə uçan və qəza nəticəsində həlak olan ekipaj üzvlərinin ailələri və sağ qalan təyyarə bələdçiləri ilə görüşündə, Rusiya tərəfinin məsuliyyətini vurğulayaraq, hava məkanının bağlanmaması səbəbindən ciddi cinayət tərkibli məqamların ortaya çıxdığını bildirib. Prezident İlham Əliyev əlavə edib ki, bu cür hallarda hava məkanı dərhal bağlanmalı və təyyarə kapitanına təhlükə barədə xəbərdarlıq edilməli idi.
Dövlət başçısının son dərəcədə önəmli açıqlamalarını Milli Məclisin deputatı Aydın Mirzəzadə Crossmedia.az-a şərh etdi. Deputat bildirdi ki, Cənab Prezidentin Aktau şəhərində qəzaya uğrayan Azərbaycan təyyarəsində həlak olanların ailə üzvlərini və sağ qalan ekipaj üzvlərini mükafatlandırma mərasimində etdiyi çıxış cəmiyyətimizdə böyük maraq doğurub. Prezident bu çıxışı ilə Azərbaycanın milli maraqlarına və dövlətimizin qüruruna verdiyi əhəmiyyəti bir daha göstərdi.
Aydın Mirzəzadənin sözlərinə görə, Azərbaycan ərazi baxımından kiçik dövlət olsa da, öz maraqlarını qorumaq və obyektivliyi təmin etməkdə israrlıdır. Prezident dekabrın 25-də baş verən aviasiya qəzası ilə bağlı çıxışında Rusiya tərəfindən buraxılan ciddi səhvlərə diqqət çəkib. O vurğulayıb ki, təhlükəsizlik tədbirlərinin vaxtında görülməməsi bu faciənin baş verməsinə səbəb olub.
"Rusiya bu gün Ukrayna ilə müharibə vəziyyətindədir və bunu digər dövlətlər başa düşür. Lakin təhlükəsizlik məsələləri digər dövlətlər üçün problem yaratmaq və həmin təhlükəsizliyi sual altına qoymaq hesabına həyata keçirilməməlidir " - deyə deputat əlavə edib. Əgər Rusiya müvafiq qurumları arasında koordinasiya təmin etsəydi və təhlükəsizlik tədbirlərini vaxtında həyata keçirsəydi, bu qəza baş verməzdi.
Deputat həmçinin qeyd edib ki, Rusiya tərəfi hadisə baş verdikdən sonra Azərbaycan xalqından üzr istəməli və günahkarların cəzalandırılması üçün təcili tədbirlər görməli idi. "Rusiya tərəfinin məsuliyyəti üzərinə götürməkdə gecikməsi təəssüf doğurur və bu, ikitərəfli münasibətlərə təsir edir," - deyə Mirzəzadə vurğulayıb.
Aydın Mirzəzadə əlavə edib ki, Azərbaycan heç vaxt günahkarların tapılması məsələsindən geri çəkilməyəcək. Deputatın sözlərinə görə, dünya bir daha şahid oldu ki, Prezident İlham Əliyev öz xalqının maraqlarını beynəlxalq hüquq çərçivəsində müdafiə edir və hər bir vətəndaşının təhlükəsizliyini prioritet hesab edir.
"Prezidentin, şəxsən həlak olanları və sağ qalan ekipaj üzvlərini təltif etməsi Azərbaycanın milli maraqlardan və vətəndaş təhlükəsizliyindən güzəştə getməyəcəyinin bariz nümunəsidir," - deyə deputat fikirlərini tamamlayıb.
Nihat Tahirov
15:20 06.01.2025
Oxunuş sayı: 9910
