“Heç bir erməni siyasətçisi demokrat və multikultural ola bilməz” - AÇIQLAMA
Ermənistanın ilk prezidenti Levon Ter-Petrosyanın 1993-cü ildə “Yerkrapa” terrorçularının qarşısında etdiyi çıxış yenidən gündəmə gəlib. Ter-Petrosyan, azərbaycanlıların Qərbi Azərbaycandan qovulmasının Ermənistanın mövcudluğunu təmin etmək məqsədilə həyata keçirildiyini etiraf edib. O, azərbaycanlıların Basarkeçər, Zəngibasarda, Amasiya və Zəngəzurda üstünlük təşkil etdiyini, bu addımın erməni milli hərəkatı və onun hərbi qanadları tərəfindən həyata keçirildiyini bildirib.
Mövzu ilə bağlı Crossmedia.az-a açıqlama verən Milli Məclisin deputatı, Qərbi Azərbaycan İcmasının sədr müavini Hikmət Babaoğlu bildirib:
“1993-cü ildə Ermənistanın keçmiş prezidenti Levon Ter-Petrosyanın çıxışı, Azərbaycanın işğal olunmuş torpaqları və Ermənistanın Azərbaycanlılara qarşı apardığı etnik təmizləmə siyasəti haqqında əhəmiyyətli məqamları özündə əks etdirir. Çıxışın ilk mühüm məqamı, Ermənistanda Azərbaycanlılara qarşı etnik təmizləmə siyasətinin həyata keçirilməsidir. Levon Ter-Petrosyan açıq şəkildə bildirir ki, bu siyasət düşünülmüş, planlı şəkildə həyata keçirilmiş və Ermənistan dövlətinin resurslarından istifadə edilərək, azərbaycanlılar müxtəlif cinayət üsulları ilə vətənlərindən qovulmuşdur. İkincisi, bu hadisələr təsadüfən baş verməmiş, əksinə, Qarabağ ətrafında gedən proseslərlə bağlı olmuşdur”.
Hikmət Babaoğlu vurğulayıb ki, bu siyasət azərbaycanlıların yaşadığı torpaqlarda etnik təmizləmə apararaq Ermənistanda monoetnik cəmiyyət yaratmağa xidmət edib:
“Nəhayət, türksüz Ermənistan yarada bildik”- bu ifadə, ermənilərin Azərbaycana gəldikləri gündən etibarən, o torpaqların əsl sahibləri olan azərbaycanlıları müxtəlif formalarda - ya deportasiya, ya da etnik təmizləmə siyasəti ilə çıxarmaq cəhdlərinin nəticəsidir”.
Hikmət Babaoğlu əlavə edib ki: “Bu hadisələrin psixoloji tərəfi də diqqətəlayiqdir. Cinayətkar, törətdiyi cinayətlə bağlı şahidlərin qalmamasını istəyir. Çünki 1828-ci ildə İrəvan xanlığı ərazisində Çar Rusiyasının göstərişi ilə yaradılan erməni vilayətindən başlayaraq, 1849-cu ildə yaradılan Erməni quberniyası, 1918-ci ildə elan edilən Ararat Respublikası və nəhayət, Ermənistan Respublikasının yaradılması zamanı Qərbi Azərbaycan ərazisində yaşayan azərbaycanlılar əsas şahidlər olmuşdular. Bu şahidlər təkcə insanlar deyil, həm də həmin coğrafiyanın dağları, çayları, daşları, ağacları, meşələri və ən əsası, o coğrafiyada əcdadlarımızın yaratdığı abidələr, qalalar və tikilmiş məscidlər idi. İslama qədərki dövrdə əcdadlarımızın yaratdığı xristian monastırları və abidələri də həmin coğrafiyanın ayrılmaz hissəsi idi. Bu irs, miladdan əvvəl 7-ci əsrə qədər gedib çıxan qıpçaqların, saklar və digər qədim tayfaların coğrafiyaya verdiyi toponimlərdən ibarət idi”.
Ermənilər son 200 ildə bu dəyərlərin hamısına qarşı mübarizə apararaq onları silmək və öz izlərini qoymaq istəyirdilər. Çünki bu adlar və orada yaşayan insanlar da tarixin şahidləri idi. Əslində, Levon Ter-Petrosyanın çıxışında bütün bu məqamlar əksini tapır.
Deputat həmçinin vurğulayıb ki, biz düşmənimizi düzgün tanımalıyıq. Heç bir erməni siyasətçisi demokrat və multikultural ola bilməz. Çünki erməni siyasətçiləri, yəni Ermənistan cəmiyyətinin məhsulu olduqlarına görə, azərbaycanlılara qarşı etnik nifrət onların qanında, qanununda və şüurunda mövcuddur. Buna görə də Ter-Petrosyan tipik erməni siyasətçisi kimi davranır.
Deputat əlavə edib ki, Ermənistanın bu siyasətinə baxmayaraq, Azərbaycan öz tarixi torpaqlarını bərpa edib və erməni təcavüzünün qarşısını qətiyyətlə alıb:
“30 illik danışıqlar dövründə Ermənistan hər zaman təhdid altında saxlanılaraq, həmin torpaqların Azərbaycana aid olduğunu göstərən mesajlar verildi. Və bu kontekstdə, biz 44 günlük müharibədə qazandığımız zəfərə diqqət yetirsək, görərik ki, ermənilərin 600 illik ideya, məqsəd və fəaliyyətlərini – hansı ki, bu məqsəd və fəaliyyətlər üçün dünyanın ən güclü dəstəyini alırdılar – biz 44 günə darmadağın etdik. Yəni ermənilərin 600 illik arzularını 44 günə yox etdik. Bununla da ən azı növbəti 600 illik xəyallarını əllərindən almış olduq. Bu da Azərbaycanın tarixi zəfərinin əhəmiyyətidir”.
Hikmət Babaoğlu sonda vurğulayıb ki, keçmiş prezidentin etirafları Azərbaycanın beynəlxalq hüquq müstəvisində mövqeyini gücləndirmək üçün ciddi əsas yaradır:
“Nəhayət, Azərbaycanın beynəlxalq hüquqa giriş məsələsinə gəldikdə isə, əlbəttə ki, bu kimi faktlar bizim üçün əlverişli əsaslar yaradır. Çünki nəticə etibarı ilə, keçmiş də olsa, bir ölkənin prezidenti bu etirafları edir və əgər məsələ beynəlxalq müstəviyə çıxarılarsa, səsləndirilən fikirlər Azərbaycanın mövqeyini gücləndirmək üçün ciddi arqument ola bilər”.
Qərbi Azərbaycannın azad edilməsi məsələsi isə hüquqi əsaslar yaradır. Ermənistanın keçmiş prezidenti tərəfindən səsləndirilən fikirlər, beynəlxalq məhkəmələrdə Azərbaycanın mövqeyini gücləndirmək üçün ciddi arqumentlər təqdim edir və Qərbi Azərbaycannın qaytarılması prosesində əhəmiyyətli rol oynaya bilər.
Maral Şahverdili
14:38 06.01.2025
Oxunuş sayı: 14324
