Gündəm
AZAL-ın qəzaya uğrayan təyyarəsi ilə bağlı istintaqın yeni təfərrüatları məlum olub
VÇK (Всесоюзная чрезвычайная комиссия - Ümumittifaq Fövqəladə Komissiyası) - OGPU-nun (Birləşmiş Dövlət Siyasi İdarəsi) məlumatına görə, artıq dəqiq məlumdur ki, təyyarəyə iki raket “Pantsir” hava hücumundan müdafiə sistemindən buraxılıb. Bu barədə Crossmedia.az “Caliber”ə istinadən yazır.
Hadisənin səbəblərindən biri tamamilə koordinasiyasızlıq olub. Belə ki, “Pantsir” sisteminin bir heyəti təyyarənin mülki təyyarə olduğunu görüb və atəş açmayıb, lakin radioelektron mübarizə (REM) səbəbindən ikinci heyəti xəbərdar edə bilməyib.
“Kim belə bir REM işə salıb ki, təkcə mülki təyyarələr yox, eləcə də hava hücumundan müdafiə sistemlərinin özləri də görmə və eşitmə qabiliyyətini itirib, hələ də tapmaq mümkün deyil. Hazırda isə getdikcə aydın olur ki, hava hücumundan müdafiə sistemləri səhvən pilotsuz uçuş aparatını (PUA) deyil, məhz təyyarəni vurub,” – deyə VÇK-OGPU-nun paylaşımında bildirilir.
VÇK-OGPU-nun istintaqla bağlı digər detalları:
• İstintaqçılar dispetçeri və uçuş rəhbərini dindiriblər, lakin onlar şahid kimi qalırlar və evə buraxılıblar.
• Hava hücumundan müdafiə sistemləri səhvən təyyarəni hədəf alıb, lakin hərbçilər daha əlverişli versiyanı – raketlərin pilotsuz uçuş aparatını vurmaq üçün buraxıldığı, məqsədə çatmayaraq AZAL təyyarəsinin yaxınlığında uğursuz şəkildə öz-özünü məhv etdiyi fikrini yaymağa çalışırlar.
• Hadisə zamanı Qroznıda iki “Pantsir”, S-300 və “Buk” yerləşdirilmişdi. Raketlər Visait rayonundakı “Pantsir” ekipajı tərəfindən buraxılıb.
• “Pantsir”in komandiri bildirib ki, raketlər Rostovdan gələn əmrlə buraxılıb. Raketlər saat 08:13:50 və 08:14:30-da partlayaraq təyyarəyə zərər yetirib. Komandir buraxılışdan əvvəl Rostova iki dəfə stasionar telefon vasitəsilə zəng edib.
• İstintaqçılar təsdiqləyib ki, təyyarə 08:14 radələrində, hava limanından 16 km məsafədə zərbə alıb. Ekipajın danışıqlarının yazısında “mənə quş dəydi” ifadəsi qeydə alınıb.
• Hava hücumundan müdafiə sistemlərinin ekipajlarına mülki uçuşların cədvəli təqdim olunmayıb.
• Hava limanında yerləşdirilən digər “Pantsir” ekipajının komandiri təyyarəni vizual olaraq müşahidə edib və atəş açmayıb.
• REM səbəbindən mobil əlaqə kəsilib, stasionar telefon əlaqəsi isə nasaz olub ki, bu da ekipajlar arasında koordinasiyaya mane olub.
Gültac Mehdizadə
16:44 31.12.2024
Oxunuş sayı: 18117
