Telefonda batareyanı sürətlə azaldan gizli funksiya aşkarlanıb
Google Pixel 10 Pro istifadəçisi bir həftə ərzində smartfonun batareya sərfiyyatını izləyərək gözləmə rejimində enerji itkisinin səbəbini araşdırıb.
Crossmedia.az “MakeUseOf”a istinadən xəbər verir ki, smartfon Wi-Fi və Bluetooth şəbəkələrini davamlı olaraq skan edib.
Məlum olub ki, telefon gecə ərzində demək olar istifadə edilmədiyi halda belə batareya səviyyəsi tədricən azalırmış. Səbəb isə Android sistemində gizli şəkildə aktiv olan iki funksiya olub.
Maraqlısı isə odur ki, bu proses Wi-Fi və Bluetooth söndürülsə belə davam edib.
Android sistemində Wi-Fi və Bluetooth skan funksiyaları məkan xidmətlərinin bir hissəsi kimi işləyir. Wi-Fi skanı yaxınlıqdakı şəbəkələri aşkar edir və onların unikal identifikasiya məlumatlarından istifadə edərək Google-un məkan bazası vasitəsilə daha dəqiq yer müəyyənləşdirməsinə kömək edir.
Bluetooth skanı isə yaxınlıqdakı cihazları və Bluetooth Low Energy (BLE) siqnallarını aşkar edərək məkan dəqiqliyini artırır.
Bu funksiyalar xüsusilə qapalı məkanlarda, məsələn, yeraltı dayanacaqlarda GPS siqnalı zəif olduqda faydalı ola bilər. Lakin bunun mənfi tərəfi də var: telefon heç bir tətbiq məkan tələb etməsə belə, simsiz modullar vaxtaşırı aktivləşərək skan həyata keçirir.
Bu gizli parametrləri söndürmək üçün Android istifadəçiləri Ayarlar → Məkan → Məkan xidmətləri bölməsinə daxil olaraq Wi-Fi skanı və Bluetooth skanı funksiyalarını deaktiv edə bilərlər.
Mütəxəssislər bildirirlər ki, bu funksiyaların söndürülməsi batareyanın ömrünü uzada bilər, lakin qapalı məkanlarda məkanın müəyyən edilməsində kiçik gecikmələr yarada bilər.
Google Maps küçədə əvvəlki kimi sürətli işləsə də, binaların daxilində istifadəçinin yerini müəyyənləşdirmək üçün daha çox vaxt tələb edə bilər.
Ekspertlər xüsusilə Wi-Fi skan funksiyasının daha çox fon aktivliyinə səbəb olduğunu qeyd edirlər. Bluetooth cihazlarından tez-tez istifadə edənlər üçün isə bu funksiyanı tam söndürmək məsləhət görülmür.
03:02 23.08.2026
Oxunuş sayı: 65
