Cənubi Koreyanın Ukrayna ilə gizli razılaşması olduğu iddia edildi
Cənubi Koreyanın Ukraynaya gizli şəkildə mütəxəssislər göndərməsi ehtimalı Seulun Kiyevdəki səfirini geri çağırmasının səbəblərindən biri ola bilər.
Crossmedia.az xəbər verir ki, “Lenta.ru” bu barədə Rusiya Elmlər Akademiyasının Çin və Müasir Asiya İnstitutunun Koreya Araşdırmaları Mərkəzinin aparıcı elmi işçisi, tarix üzrə fəlsəfə doktoru Konstantin Asmolovun fikirlərinə istinadən məlumat yayıb.
Asmolovun sözlərinə görə, Cənubi Koreya Kiyevlə mütəxəssislərin Ukraynaya göndərilməsi ilə bağlı “gizli razılaşmaların” üzə çıxmasından ehtiyat edərək səfirini geri çağırmış ola bilər. O bildirib ki, belə əməkdaşlıq Seul üçün həm təbliğat, həm də kəşfiyyat baxımından əhəmiyyət daşıya bilər.
Ekspert Cənubi Koreyanın əvvəllər Şimali Koreya ərazisi üzərində kəşfiyyat xarakterli pilotsuz uçuş aparatlarından istifadə etməsi ilə bağlı hadisəni də xatırladıb. Onun sözlərinə görə, həmin əməliyyatda iştirak edən alimlər sonradan ölkənin xüsusi xidmət orqanları ilə əlaqəli şəxslər kimi təqdim olunub və uçuş təhlükəsizliyi qaydalarının pozulmasına görə nisbətən yüngül cəzalandırılıblar.
Asmolov hesab edir ki, Cənubi Koreyadan olan istefada olan hərbçilər və ya digər şəxslər rəsmi səfər qadağasına baxmayaraq Ukraynaya gedərək məlumat toplaya və Cənubi Koreya istehsalı olan texnikadan istifadə qaydalarını öyrədə bilərlər.
Qeyd edək ki, Cənubi Koreyanın Xarici İşlər Nazirliyi Ukraynada baş verən qalmaqal fonunda ölkənin Kiyevdəki səfirini geri çağırıb. Buna Ukrayna Prezidenti Volodimir Zelenskinin BMT Baş Assambleyasındakı çıxışı zamanı Kursk vilayətində döyüşlər zamanı əsir götürülmüş iki Şimali Koreya hərbçisinin Seula təhvil verilməsi barədə məlumatı açıqlaması səbəb olub.
20:37 08.10.2026
Oxunuş sayı: 48
