"Dəmir Yumruğ"un sarsılmaz iradəsi!
Son bir neçə gündə baş verən hadisələrlə bağlı Elm və təhsil nazirinin müşaviri Nicat Məmmədli Facebook sosial şəbəkəsində maraqlı status paylaşıb.
Crossmedia.az olaraq həmin paylaşımı təqdim edirik:
“Aleksandr Dümanın Qraf Monte Kristo əsəri yadıma düşdü.
Baron Danqlar öz mənafeləri naminə göstərdiyi təkəbbürün simvoluna çevrilir—hiylə, xəyanət və manipulyasiya yolu ilə böyük sərvət və nüfuz qazanır. O, sahib olduğu mövqeyin onu məsuliyyətdən qoruyacağını düşünür. Lakin...
Xəyanət etdiyi Edmon Dantesin sarsılmaz iradəsi ilə üz-üzə qalır. Elə həmin həlledici anda onun bütün lovğalığı və saxta görüntüsü puç olur. Aclığın, qorxunun təzyiqi altında, bir zamanlar qürrəli baron özünü xilas etmək üçün mərhəmət diləyir və günahlarını etiraf edir. Ədaləti təmin etmək uğrunda qərarlı, lakin mərhəmət hissindən xali olmayan Qraf ona azadlıq bağışlayır və Danqlara bu sadə həqiqəti anladır: təkəbbür, keçmişdəki haqsızlıqları düzəltməyə qətiyyət göstərən sarsılmaz bir iradə qarşısında sipər ola bilməz.
Zülmün təntənəsi olan "dəmir çəkicə" qarşı ədalətin təntənəsi olan "Dəmir Yumruğ"un sarsılmaz iradəsi!”
14:45 28.12.2024
Oxunuş sayı: 8006
