Diqqətli olun!: Spirtli içkilər indi daha təhlükəlidir
Rusiyalı endokrinoloq Oleq Nankin deyib ki, istənilən spirtli içki isti havada daha çətin həzm edilir.
O, yayda ən təhlükəli alkoqollu içkiləri açıqlayıb.
Oleq Nankin şirin alkoqollu içkiləri ən pis spirtli içki seçimi hesab edir. Onun sözlərinə görə, bu içkilər su içmək istəyini və susuzluğu artırır, həmçinin onları içmək asandır və bu səbəbdən də insanlar fərqində olmadan şərti təhlükəsizдшл normasını aşa bilər.
Yay mövsümündə havanın temperaturunun yüksəlməsi ilə birlikdə spirtli içkilərin sağlamlığa təsiri də daha qabarıq şəkildə özünü göstərir. Xüsusilə yüksək alkoqol tərkibli və şirin spirtli içkilər orqanizmdə maye itkisini sürətləndirərək susuzlaşma, günvurma və ürək-damar sisteminə əlavə yük kimi ciddi risklər yarada bilər.
Bu barədə Crossmedia.az-a danışan professor, tibb elmləri doktoru Adil Qeybulla bildirib ki, həkim olaraq alkoqol qəbulunu tövsiyə etməsə də, ondan istifadə edən şəxslər mümkün riskləri nəzərə almalıdırlar: "Alkoqol qəbul etmək istəyənlər ilk növbədə həddindən artıq istifadədən çəkinməlidirlər. Əsas təhlükələrdən biri məhz normadan artıq alkoqol qəbuludur."
Ekspertin sözlərinə görə, yay aylarında alkoqolun yaratdığı susuzlaşma riski daha da artır:
"Alkoqol orqanizmdə maye balansını pozur və susuzlaşmaya səbəb olur. Yay mövsümündə yüksək temperatur səbəbindən dəri və tənəffüs yolu ilə daha çox maye itirilir. Alkoqol qəbulu isə bu prosesi daha da sürətləndirir. Nəticədə qan qatılaşa bilər ki, bu da tromboz, infarkt, insult və digər ağır fəsadların yaranma riskini artırır."
A.Qeybulla vurğulayıb ki, alkoqol qəbulundan sonra yaranan ağırlaşmalar ev şəraitində müalicə edilməməlidir:
"Alkoqol qəbulundan sonra hər hansı ağırlaşma və ya yan təsirlər meydana çıxarsa, mütləq həkimə müraciət edilməli və lazım gəldikdə təcili tibbi yardım çağırılmalıdır. Belə halları ev şəraitində həll etməyə çalışmaq doğru deyil. Düzdür, maye qəbulu müəyyən qədər faydalı ola bilər, lakin bəzi vəziyyətlərdə peşəkar tibbi yardım zəruridir."
Qida eksperti Fərid Səfərov isə açıqlamasında bildirib ki, yay aylarında spirtli içkilərin qəbulu orqanizmdə susuzlaşma riskini əhəmiyyətli dərəcədə artırır:
"Yüksək temperatur səbəbindən yay mövsümündə orqanizm daha çox maye və mineral itirir. Bu dövrdə spirtli içkilərin qəbulu susuzlaşmanı daha da gücləndirir, ürək-damar və sinir sisteminə əlavə yük yaradır. Xüsusilə araq, viski, konyak kimi yüksək alkoqol tərkibli içkilər su itkisini artırdığı üçün daha böyük risk daşıyır. Tərkibində həm alkoqol, həm də yüksək miqdarda şəkər olan kokteyllər və digər şirin spirtli içkilər də susuzlaşmanı dərinləşdirə, qanda şəkərin kəskin dəyişməsinə səbəb ola bilər."
Ekspertin sözlərinə görə, alkoqolun sidikqovucu təsiri orqanizmdən vacib mineralların da itirilməsi ilə nəticələnir:
"Alkoqol sidikqovucu təsir göstərdiyindən orqanizmdən su ilə yanaşı natrium, kalium kimi mühüm minerallar da xaric olur. Nəticədə halsızlıq, başgicəllənmə, əzələ spazmları, diqqətin azalması və hətta günvurma riski artır. Bundan əlavə, alkoqol bədənin temperaturu tənzimləmə qabiliyyətini zəiflətdiyi üçün insan isti havanın təsirini daha gec hiss edə bilər."
F.Səfərov vurğulayıb ki, isti havalarda spirtli içkilərdən mümkün qədər uzaq durmaq ən düzgün seçimdir:
"Əgər spirtli içki qəbul ediləcəksə, mütləq kifayət qədər su içilməli, alkoqol acqarına qəbul olunmamalı, yağlı və həddindən artıq duzlu qidalarla birlikdə istifadə edilməməlidir. Günün ən isti saatlarında, xüsusilə birbaşa günəş altında spirtli içki qəbulundan çəkinmək vacibdir. Meyvə, tərəvəz və su ilə zəngin qidaların istehlakı, həmçinin gün ərzində kifayət qədər maye qəbulu orqanizmin su-elektrolit balansının qorunmasına kömək edir. Xroniki xəstəlikləri olan şəxslər, yaşlılar və hamilələr isə yay aylarında ümumiyyətlə spirtli içkilərdən uzaq durmalıdırlar”.
Nigar Xəlilli
17:00 13.07.2026
Oxunuş sayı: 59
