Azərbaycan və İtaliya münasibətləri müttəfiqlik səviyyəsinə çata bilər
İyulun 9-da Azərbaycan Respublikasının müdafiə naziri general-polkovnik Zakir Həsənov ölkəmizdə səfərdə olan İtaliyanın Müdafiə Nazirliyinin milli silahlanma direktoru admiral Giacinto Ottavianinin rəhbərlik etdiyi nümayəndə heyətini qəbul edib.
Azərbaycan və İtaliya arasında müdafiə sahəsində əməkdaşlıq müzakirə olunub.
Azərbaycanın xarici siyasətində ikitərəfli əlaqələrin inkişafı mühüm yer tutur və bu kontekstdə İtaliya ilə tərəfdaşlıq xüsusi əhəmiyyət kəsb edir. Avropanın aparıcı iqtisadiyyatlarından biri olan İtaliya, hazırda Azərbaycanın ən böyük ticarət tərəfdaşlarındandır. Müasir texnologiyalar, müdafiə sənayesi və regional təhlükəsizlik kimi sahələrdə qarşılıqlı maraqlara əsaslanan bu münasibətlər, hər iki dövlətin beynəlxalq hüquq normalarına verdiyi önəmi əks etdirir. Bu əməkdaşlıq, tərəflərin gələcəyə yönəlmiş strateji hədəflərinin birləşməsində mühüm rol oynayır. Təbii ki, ölkəmizin gələcəkdə İtaliya ilə də strateji müttəfiq olacağı istisna deyil və olmamalıdır da.
Məsələnin prespektivləri ilə əlaqədar hərbi ekspert Emin Həsənli Crossmedia.az-a açıqlama verib:
"Azərbaycan dünyanın bir çox ölkəsi ilə ikitərəfli əməkdaşlığa üstünlük verir. Bu ölkələrdən biri də İtaliyadır. Avropada bizim iqtisadi əməkdaşlığımızın ən yüksək olduğu dövlətlərdən, ən böyük iqtisadi tərəfdaşlarımızdan biri məhz İtaliyadır. İtaliya dünyanın "Böyük Yeddiliy"inə (G7) daxil olan bir ölkədir.
İqtisadi qüdrətə malik olan bu dövlət, eyni zamanda NATO-nun üzvüdür və müasir texnologiyalara sahibdir. Azərbaycan da bu texnologiyaların əldə edilməsində olduqca maraqlıdır. Hazırda Azərbaycanın qüdrəti günü-gündən artır, müdafiə sənayesi potensialı yüksəlir. Vətən müharibəsində əldə etdiyi zəfər isə Azərbaycanın nüfuzunu daha da artırır.
Azərbaycan həm iqtisadi, həm də siyasi cəhətdən dünya üçün çox əhəmiyyətli bir ölkədir və strateji bir bölgədə yerləşir. Eyni zamanda, ölkəmiz hər bir sahədə əməkdaşlığı daha da dərinləşdirir. İndi dünya elə bir zamandadır ki, texnologiya sürətlə inkişaf edir. Hər bir dövlət öz qüdrətinin artmasına, müasir texnologiyalarla təmin edilməsinə çalışır. Azərbaycan da bu istiqamətdə addımlar atır, dünyanın aparıcı ölkələri ilə əməkdaşlıq edir.
Bu ölkələrdən biri də İtaliyadır. Hesab edirəm ki, Azərbaycan müttəfiqlərinin, dostlarının sayını artırmağa çalışır və təbii ki, gələcəkdə bu əməkdaşlıq müttəfiqliyə də çevrilə bilər. Niyə də yox?
İtaliya və Azərbaycan hər zaman qarşılıqlı hörmət, inam və etibar əsasında, beynəlxalq hüquq normalarını və bir-birlərinin maraqlarını nəzərə alaraq çox yaxşı əməkdaşlıq ediblər. Hesab edirəm ki, bu əməkdaşlıq gələcəkdə daha da yüksələcək".
O, xatırladıb ki, Türkiyə Azərbaycanın təbii müttəfiqidir, Pakistan və Türkiyə qardaş ölkələrdir: "Bundan əlavə, Azərbaycanın dünyanın bir çox ölkəsi ilə çox yaxşı münasibətləri var. Azərbaycan çalışır ki, hər bir dövlətlə normal münasibətləri olsun. O cümlədən, NATO-nun və Avropanın əhəmiyyətli dövlətlərindən, dünyanın aparıcı ölkələrindən biri olan İtaliya ilə də bu əməkdaşlığın daha da dərinləşməsində maraqlıdır".
Turqut Ansari
19:57 10.07.2026
Oxunuş sayı: 57
