İsrail həbsxanalarında fələstinli məhbuslara işgəncə verilir
İsrail həbsxanalarında saxlanılan minlərlə fələstinlinin aclığa, ağır fiziki zorakılığa, qaşınma xəstəliyinin yayılmasına və tibbi yardımdan məhrum edilməyə məruz qaldığı bildirilir.
Crossmedia.az xəbər verir ki, İsrailin “Haaretz” qəzeti apardığı araşdırmada son üç ildə həbsxanalarda sistematik işgəncə və pis rəftar hallarının geniş yayıldığını yazıb. Nəşrin məlumatına görə, bu təcrübələr gizli həyata keçirilmir və İsrailin ifrat sağçı milli təhlükəsizlik naziri İtamar Ben-Qvirin siyasi kampaniyasında da ön plana çıxıb.
Məqalədə qeyd olunur ki, İsrail Ali Məhkəməsinin məhbusların kifayət qədər qida ilə təmin edilməsi və Beynəlxalq Qırmızı Xaç Komitəsinin ziyarətlərinin bərpası barədə qərarlarına baxmayaraq, həbsxanalardakı vəziyyət dəyişməyib.
Sentyabr ayına olan məlumata görə, İsrail həbsxanalarında 9 329 fələstinli saxlanılıb. Onların yalnız 16 faizi məhkəmə qərarı ilə həbs edilib. Digərləri arasında ittiham irəli sürülmədən saxlanılan inzibati məhbuslar, cinayət işi üzrə saxlanılan şəxslər və İsrailin “qanunsuz döyüşçü” statusu verdiyi şəxslər var.
Araşdırmada bildirilir ki, “qanunsuz döyüşçü” statusu Qəzza zolağından, Suriyadan və Livandan saxlanılan şəxslərin hərbi əsir və ya cinayət işi üzrə məhbus hüquqlarından məhrum edilməsinə imkan yaradır.
“Haaretz” 2025-ci ilin aprelindən 2026-cı ilin iyulunadək Megiddo, Nafha, Ketziot, Ofer və fələstinli qadınların saxlanıldığı Damon həbsxanalarından azad edilmiş beş fələstinlinin ifadələrini dərc edib. Onların hamısı işğal altındakı İordan çayının qərb sahilinin sakinləridir. Digər keçmiş məhbusların isə mümkün qisasdan ehtiyat etdikləri üçün danışmaqdan çəkindikləri bildirilib.
İfadə verən beş nəfərin hamısının aclıq səbəbindən bədən çəkilərinin 15–50 faizini itirdiyi, sümüklərinin sınmasına səbəb olacaq dərəcədə döyüldüyü və saxlanma kameralarında yayılan qaşınma xəstəliyinə yoluxduğu qeyd olunub.
Araşdırmada həbsxanalarda zorakılıq və pis rəftar hallarının həyata keçirilməsində İsrail Həbsxana Xidmətinin ilkin müdaxilə bölməsi olan “Keter” xüsusi bölməsinin roluna da diqqət çəkilib.
Məqalədə Qəzza zolağından saxlanılan şəxslərin vəziyyətinin isə daha ağır olduğu vurğulanıb.
01:20 10.10.2026
Oxunuş sayı: 57
