Ermənistan Konstitusiya Məhkəməsi parlament seçkiləri ilə bağlı qərar verdi
Ermənistan Konstitusiya Məhkəməsi müxalifət partiyalarının müraciətlərinə baxdıqdan sonra parlament seçkilərinin nəticələrinin etibarsız sayılması tələbini rədd edib.
Crossmedia.az yerli mediaya istinadən xəbər verir ki, məhkəmənin qərarı qətidir və dərc olunduğu andan qüvvəyə minib.
Bildirilib ki, müraciətlərə baxılması iyunun 26-dan iyulun 1-dək davam edib. Bundan sonra hakimlər qərar qəbul etmək üçün müşavirə otağına çəkiliblər.
Xatırladaq ki, Ermənistanda parlament seçkiləri 2026-cı il iyunun 7-də keçirilib. Rəsmi nəticələrə əsasən, parlamentə üç siyasi qüvvə daxil olub. Hakim "Vətəndaş Müqaviləsi" Partiyası 49,7456 faiz (726 819 səs), "Güclü Ermənistan" bloku 23,2710 faiz (340 060 səs), "Ermənistan" bloku isə 9,9231 faiz (144 983 səs) toplayıb.
Səslərin hesablanmasının müəyyən mərhələsində parlamentə düşmək şansı olan "Çiçəklənən Ermənistan" Partiyası isə yekunda 58 287 səs (3,9893 faiz) əldə edib və qanunla müəyyən edilmiş 4 faizlik seçki baryerini aşa bilməyib.
Yeni parlamentdə "Vətəndaş Müqaviləsi" 64, "Güclü Ermənistan" 29, "Ermənistan" bloku isə 12 mandat qazanıb.
Beləliklə, hakim siyasi qüvvə parlament çoxluğunu qoruyub saxlayıb. Lakin ölkə Konstitusiyasına birtərəfli dəyişiklik etmək üçün tələb olunan konstitusiya çoxluğunu əldə edə bilməyib.
Qeyd edək ki, iyunun 19-da "Güclü Ermənistan", "Çiçəklənən Ermənistan", "Ermənistan", "Birliyin Qanadları", "Demokratiya, Qanun, Nizam", "Respublika naminə Demokratiyanın Müdafiəçiləri İttifaqı" və "Yeni Güc" olmaqla yeddi siyasi qüvvə seçkilərin nəticələrinin ləğv edilməsi tələbi ilə Konstitusiya Məhkəməsinə müraciət etmişdi.
18:12 04.07.2026
Oxunuş sayı: 53
