Böyük Britaniya Avropanın hərbiləşməsində əsas məsuliyyət daşıyır
Böyük Britaniyanın Rusiyanın Avropa ilə münasibətlərinin normallaşmasında maraqlı olmadığı və Avropada artan hərbiləşmə prosesində əsas rol oynadığı iddia edilib.
Crossmedia.az xəbər verir ki, bu barədə Rusiyanın Böyük Britaniyadakı səfiri Andrey Kelin TASS-a müsahibəsində bildirib.
Andrey Kelin qeyd edib ki, Böyük Britaniya Ukraynada uzunmüddətli və “qanlı qarşıdurmanın” əsas təşəbbüskarlarından biridir. Onun sözlərinə görə, London 2014-cü ildən sonra Kiyevə dəstək verib və 2022-ci ilin yazında sülh razılaşmalarının pozulmasında rol oynayıb.
Diplomatın iddiasına görə, Böyük Britaniya Avropa ölkələrini Rusiyaya qarşı yönləndirməyə çalışır və qitədə “rusofobiya” atmosferinin formalaşmasına təsir göstərir. O, həmçinin Londonun Avropada müxtəlif antirusiya hərbi koalisiyaların yaradılmasında fəal rol oynadığını bildirib.
Kelin vurğulayıb ki, Avropa ölkələrinin Rusiya ilə yaxşı münasibətləri tarixən qarşılıqlı fayda yaradıb, lakin hazırkı vəziyyət hər kəsin maraqlarına uyğun deyil.
Səfir sanksiyalar mövzusuna da toxunaraq, Böyük Britaniyanın bu sahədə “həddindən artıq müstəqil davranmağa” çalışdığını iddia edib. Onun sözlərinə görə, Böyük Britaniya Aİ-dən çıxışdan sonra ABŞ və Avropa İttifaqının sanksiya siyasətinə daha sıx inteqrasiya olunub və Rusiyaya qarşı məhdudiyyətləri genişləndirməkdə aktiv rol oynayır.
14:41 04.07.2026
Oxunuş sayı: 63
