Atəşkəs yaxınlaşır, sülh isə hələ uzaqdadır – Kvasnevski
Polşanın sabiq prezidenti Aleksandr Kvasnevski hesab edir ki, Ukrayna müharibəsində real atəşkəsə qədər cəmi bir neçə ay qala bilər.
Crossmedia.az UNİAN-a istinadən xəbər verir ki, siyasətçinin fikrincə, yaxın aylarda tərəflər real atəşkəsə yaxınlaşa bilər, lakin hələlik sülhdən danışmaq tezdir.
“Putin (RED: Kreml rəhbəri Vladimir Putin nəzərdə tutulur) Rusiyanın lideri olduğu müddətdə bu ölkənin real və xüsusilə də ədalətli sülhdə maraqlı olacağına inanmıram. Amma düşünürəm ki, biz müəyyən atəşkəsə və yeni vəziyyətə yaxınlaşırıq”, – deyə Kvasnevski bildirib.
O, həmçinin Kremlin mümkün fasilədən qoşunların yenidən qruplaşdırılması, silah istehsalının artırılması və yeni hərbi əməliyyatlara hazırlıq üçün istifadə etməyə çalışacağını vurğulayıb.
Kvasnevskinin sözlərinə görə, Qərb isə bu müddəti arxayınlaşmaq üçün deyil, Ukraynaya dəstəyi gücləndirmək, ölkənin bərpasını sürətləndirmək, Avropa İttifaqına inteqrasiya prosesini irəli aparmaq və hərbi yardımı davam etdirmək üçün dəyərləndirməlidir.
13:11 25.06.2026
Oxunuş sayı: 57
