Sidneydə Azərbaycan mədəniyyəti beynəlxalq tədbirdə nümayiş olundu
23 may tarixində Avstraliyanın Sidney şəhərində Asiya multikultural icmasının tədbiri keçirilib.
Crossmedia.az xəbər verir ki, tədbirdə Azərbaycanı Avstraliya Azərbaycanlıları Assosiasiyası və Güney Azərbaycan Demokratik Türk Birliyi təmsil edib. Təşkilatın beynəlxalq əlaqələr və insan haqları departamentinin sədri Sara Azərsun tədbirə rəsmi dəvətlə qatılıb.
Belə ki, “Bundhu” multikultural Asiya şöbəsinin təşkil etdiyi tədbirdə müxtəlif xalqlar öz milli geyimlərini, mətbəxlərini və milli rəqslərini nümayiş etdiriblər. Tədbirdə Avstraliya rəsmiləri, ictimai-siyasi xadimlər və müxtəlif ölkələrin diaspor nümayəndələri iştirak ediblər.
Qeyd edək ki, Azərbaycan, Türkiyə, Çin, Koreya, Monqolustan, Banqladeş və Vyetnam icmaları öz mədəniyyətlərini təqdim edərək tədbirə rəng qatublar. Güney Azərbaycan Demokratik Türk Birliyinin departament sədri Sara Azərsun çıxışında Azərbaycanın qədim tarixi, zəngin mədəniyyəti, multikultural dəyərləri və milli irsi barədə məlumat verib. O, Azərbaycanın müxtəlif dinlərin və xalqların sülh şəraitində yaşadığı ölkə olduğunu vurğulayıb, həmçinin Novruz bayramı, Azərbaycan xalçaları və milli mətbəxindən danışıb.
15:54 23.05.2026
Oxunuş sayı: 39
