Xarici xəbərlər

Köçəryan Ermənistan hökumətini tənqid edib

Ermənistanın keçmiş prezidenti Robert Köçəryan hakimiyyəti Avrasiya İqtisadi İttifaqı (Aİİ) və ümumilikdə regional siyasətə yanaşmasına görə sərt tənqid edib.

Crossmedia.az bu barədə xarici mediaya istinadən xəbər verir.

O, seçki kampaniyası zamanı jurnalistlərə açıqlamasında bildirib ki, hazırkı hökumət ölkəni Aİİ ilə bağlı “fəlakətə sürükləyən siyasət” həyata keçirir. Köçəryan Rusiyadan gələn “eyni anda həm Aİ, həm də Aİİ-də olmaq mümkün deyil” məzmunlu bəyanatları xatırladaraq, Ermənistan hakimiyyətinin ziddiyyətli mövqe sərgilədiyini deyib.

Onun sözlərinə görə, hökumət bir tərəfdən anti-Rusiya ritorikası səsləndirir, digər tərəfdən isə Moskva ilə ciddi problemin olmadığını iddia edir:

“Niyə bunu edirlər? Bilmirəm, onlardan soruşun. Mən bunu izah edə bilmirəm”, – deyə Köçəryan bildirib.

Keçmiş prezident, həmçinin Tramp marşrutu (TRIPP) təşəbbüsünə də toxunub. Onun fikrincə, İranla gərginlik yaşayan bir ölkənin nümayəndələrini sərhəd layihəsinə cəlb etmək çətindir. Köçəryan hesab edir ki, ya İrana dost ölkələr layihəyə dəvət olunmalı, ya da marşrut tam hazır şəkildə tikilib istifadəyə verilməlidir.

🖨 Çap et

18:09 20.05.2026

Oxunuş sayı: 47