Türküstan Zirvəsində regional əməkdaşlığın gələcəyi müzakirə olunur
Azərbaycan Prezidenti İlham Əliyev Türk Dövlətləri Təşkilatının Dövlət başçılarının qeyri-rəsmi Zirvə görüşündə iştirak etmək məqsədilə mayın 15-də Qazaxıstana işgüzar səfərə gəlib.
Türküstan şəhərində keçirilən görüş çərçivəsində təşkilata üzv ölkələr arasında siyasi, iqtisadi və nəqliyyat-logistika sahələrində əməkdaşlığın genişləndirilməsi ilə bağlı mühüm müzakirələrin aparılması gözlənilir.
Türküstan şəhərinin Hazret Sultan Beynəlxalq Aeroportunda Azərbaycan dövlət başçısının şərəfinə fəxri qarovul dəstəsi düzülüb. Prezident İlham Əliyevi Qazaxıstanın Dövlət müşaviri Yerlan Karin, Türküstan vilayətinin akimi Nuralxan Kuşerov və digər rəsmi şəxslər qarşılayıblar.
Məsələ ilə bağlı Milli Məclisin deputatı Aydın Mirzəzadə Crossmedia.az-la öz fikirlərini bölüşüb:
"Azərbaycan-Qazaxıstan münasibətləri hər iki dövlət müstəqilliyini bərpa etdikdən sonra keyfiyyətcə yeni və daha yüksək mərhələyə yüksəlib. Hələ sovet dövründən etibarən iki xalq arasında formalaşmış dostluq və qardaşlıq münasibətləri müxtəlif sahələri əhatə edib. Müstəqillik illərində isə bu əlaqələr daha da möhkəmlənərək strateji tərəfdaşlıq səviyyəsinə çatıb.
İstər Nursultan Nazarbayev, istərsə də Kassym-Jomart Tokayev dövründə Qazaxıstan daim Azərbaycanın suverenliyini və ərazi bütövlüyünü dəstəkləyib. Bu gün də iki qardaş Türk dövləti arasında siyasi, iqtisadi, nəqliyyat, enerji və humanitar sahələrdə əməkdaşlıq ardıcıl şəkildə genişləndirilir.
Azərbaycan və Qazaxıstan qarşılıqlı münasibətləri xarici siyasətlərinin prioritet istiqamətlərindən biri kimi qiymətləndirirlər. Azərbaycan Prezidenti Ilham Aliyevin Qazaxıstana səfəri də iki ölkə arasındakı strateji tərəfdaşlığın və qardaşlıq münasibətlərinin ən bariz göstəricilərindən biridir".
Elmir Heydərli
17:00 15.05.2026
Oxunuş sayı: 57
