"İki stulda oturan" Paşinyanı nə gözləyir?: Ya terror aktı olacaq, ya da...
Ermənistan və Rusiya arasında siyasi münasibətlərdə son dövrlər müşahidə olunan ziddiyyətlər davam etməkdədir. Tərəflər arasında müxtəlif istiqamətlərdə fikir ayrılıqları getdikcə daha açıq şəkildə hiss olunur. Bu fonda Rusiya prezidenti Vladimir Putinin köməkçisi Yuri Uşakov Ermənistanın xarici siyasət kursunu şərh edib. O, İrəvanın balanslaşdırma siyasətini “iki stulda oturmaq” yanaşmasının davamı kimi qiymətləndirib. Ushakovun sözlərinə görə, bu cür xətt ziddiyyətli və qeyri-sabit xarakter daşıyır. Onun fikrincə, Ermənistanın eyni vaxtda fərqli güc mərkəzləri arasında manevr etməsi uzunmüddətli perspektivdə dayanıqlı nəticə vermir. Bu açıqlama iki ölkə arasında mövcud siyasi gərginliyin davam etdiyini bir daha gündəmə gətirir.
Mövcud vəziyyəti Crossmedia.az-a şərh edən politoloq Tofiq Abbasov da söyləyib ki, Ermənistanın hazırkı vəziyyəti bir növ suallar doğurur: " İlk növbədə, aprelin 1-i Nikol Paşinyan Moskvada səfərdə olarkən Rusiya lideri Vladimir Putin onun yadına saldı ki, eyni vaxtda iki iqtisadi blokda olmaq mümkün deyil. Bir yandan Avrasiya iqtisadi məkanındasınız, Rusiya və onun müttəfiqləri ilə əməkdaşlıq edirsiniz. Digər tərəfdən isə Avropa Birliyinə inteqrasiyadan danışırsınız və göstərirsiniz ki, gələcəyinizi orada görürsünüz. Belə olduğu halda Vladimir Putin bildirib ki, həm orada, həm də burada olmaq mümkün deyil. Ermənistanın Avrasiya iqtisadi məkanında olması ona müəyyən imtiyazlar verir. Ölkə əlavə vergilərdən qorunur, malların daşınmasında rüsumlar daha cüzi tətbiq edilir. Açıq sərhədlərin və ticari əlaqələrin üstünlüklərindən də Ermənistan kifayət qədər yararlanır. Bununla yanaşı, digər tərəfdən Avropa İttifaqına inteqrasiya etmək istədiyini bildirir və bunu öz arzusu kimi təqdim edir. Burada yada salmaq lazımdır ki, hələ 2013-cü ildə Ermənistanın sabiq prezidenti Serj Sarkisyan Avropa İttifaqı ilə assosiativ saziş imzalamaq niyyətində idi. Avropa İttifaqı həmin dövrdə bu təklifləri həm Ermənistana, həm Azərbaycana, həm də digər ölkələrə edirdi. Azərbaycan Prezidenti isə açıq şəkildə bildirmişdi ki, ölkə buna hazır deyil və lazım olan vaxtda bu barədə mövqeyini açıqlayacaq. Hətta Azərbaycan Prezidenti Avropa Parlamentində çıxışı zamanı bu məsələyə toxunmuşdu. Serj Sarkisyan isə Moskvaya çağırıldı və ona bildirildi ki, təhlükəsizlik, müdafiə sistemi və logistik mexanizmlərin təmin olunması Rusiyanın nəzarətində qalacaq. Nəticədə Ermənistan həmin prosesdən ciddi qazanc əldə edə bilmədi. Hazırda Nikol Paşinyanın da oxşar siyasət yürütməyə çalışdığı görünür. O, özünü qərb demokratiyasına yaxın göstərməyə çalışır. Amma bu, təbii ki, Rusiyanın maraqlarına uyğun deyil".
T.Abbasovun sözlərinə görə, Rusiyanın Ermənistana yatırdığı investisiyalar kifayət qədər böyükdür: "Belə ki, əsas işləyən müəssisələrin səhmlərinin böyük hissəsi Rusiya tərəfinin nəzarətindədir. Ermənistan uzun illər Rusiyadan müxtəlif iqtisadi üstünlüklər əldə edib. Putin özü də bildirib ki, "iki stulda eyni vaxtda oturmaq" mümkün deyil. Yəni, seçim etməyə məcbur qalacaqlar. Mənə elə gəlir ki, Ermənistan bu məsələdə dirəniş göstərsə, Rusiyanın cavabı sərt ola bilər. İlk növbədə, Rusiya əlaqələri məhdudlaşdıra bilər və bu halda Ermənistan ciddi problemlərlə üzləşər. Ona görə də Ermənistan gələcək siyasi hədəflərini düzgün müəyyən etməli, öz imkanlarını düzgün hesablamalı və həqiqətən müstəqil siyasət yürütmək istədiyini göstərməlidir. Hələlik isə bunun əlamətləri çox zəif görünür".
Politoloq hesab edir ki, seçkilərə qədər Ermənistanda müəyyən qeyri-adi proseslər baş verə bilər: " Ölkə daxilindəki gərginlik və nifrət atmosferi göstərir ki, zorakılıq elementləri hələ də qalmaqdadır. İstənilən məqamda dövlət çevrilişi və ya terror aktı ehtimalı da mümkündür".
Fatimə
19:04 11.05.2026
Oxunuş sayı: 61
