TƏBİB-də dəyişikliklər nə vəd edir? – prioritetlər və gözləntilər
TƏBİB-in İdarə Heyətində baş verən dəyişikliklər ölkənin səhiyyə idarəetmə sistemində yeni mərhələnin başlanğıcı kimi qiymətləndirilir.
Bu cür kadr yenilənmələri adətən yalnız rəhbər heyətin dəyişməsi ilə məhdudlaşmır, həm də qurumun fəaliyyət prioritetlərində, idarəetmə mexanizmlərində və xidmət keyfiyyətində yeni yanaşmaların formalaşmasına yol açır.
Gözləntilər ondan ibarətdir ki, yeni rəhbərlik səhiyyə xidmətlərinin əlçatanlığı, idarəetmədə şəffaflıq, regionlarda tibbi xidmətlərin keyfiyyəti və resursların səmərəli idarə olunması kimi istiqamətlərə xüsusi diqqət yetirəcək.
Eyni zamanda, sistemdə zaman-zaman ortaya çıxan narazılıqların və təşkilati problemlərin aradan qaldırılması üçün daha çevik və nəticəyönümlü idarəetmə modelinin tətbiqi də əsas prioritetlərdən biri ola bilər.
Bu dəyişikliklər fonunda əsas sual ondan ibarətdir ki, yeni komanda səhiyyə sistemində davamlı islahatları necə dərinləşdirəcək və əvvəlki mərhələlərdə müşahidə olunan çatışmazlıqların təkrarlanmaması üçün hansı institusional mexanizmləri gücləndirəcək.
Mövzu ilə bağlı Milli Meclisin deputatı Pərvanə Vəliyeva Crossmedia.az-a açıqlama verib:
"Səhiyyə sahəsində davamlı islahatların aparılması dövlətimizin əhalinin sosial müdafiəsinə yönəlmiş siyasətinin tərkib hissəsidir. İdarəçilikdə optimallaşma, eyni növdən xidmət strukturlarının birləşdirilməsi vətəndaşların operativ, keyfiyyətli və səmərəli xidmətlər əldə etməsinə hesablanıb.
“Tibbi sığorta haqqında” qanuna əsasən, icbari tibbi sığorta əhalinin sosial müdafiə formasıdır və dövlət sosial sığortasının tərkib hissəsidir. Tibbi və sosial sığorta üzrə qurumların birləşdirilməsi də bu müddəanı doğrulayır.
İcbari tibbi sığortanın ölkə üzrə tətbiqi əlçatanlığı və səhiyyə müəssisələrinə müraciəti artırdığı üçün yeni çağırışlara uyğunlaşma ehtiyacı yarandı. Bu da səhiyyə sistemində, tibbi xidmətlərin optimallaşmasını tələb edir.
Xidmətlərin və kadrların yerli ehtiyaclara uyğun bölüşdürülməsinə ehtiyac var. Ölkə üzrə tibbi xidmətlərin qiymətləndirilməsi lazımdır. Bu əsasda da vahid strategiya hazırlanmalı və tətbiq edilməlidir. Qarşıya real hədəflər qoyulmalı və bunun üçün davamlı iş aparılmalıdır".
Deputat qeyd edib ki, bu, tibbi xidmət almaq üçün Bakıya əhali axınının da qarşısını almış olar:
"TƏBİB-də həyata keçirilən islahatlar vətəndaş məmnunluğunun artırılmasına hədəflənir və qurumun səhiyyə sisteminin çağırışlarına operativ uyğunlaşdırılması nəzərdə tutulur.
Səhiyyə sahəsində son islahatlar məhz rifahın yaxşılaşdırılmasına xidmət edəcək.
Rəqəmsal texnologiyaların inkişafı səhiyyə sistemində daha da sürətləndirilməlidir. Elektron reseptlər, onlayn məsləhətlər və tibbi məlumatların, tarixçənin vahid sistemdə toplanması həm həkimlərin işini asanlaşdırır, həm pasiyentlərin xidmətlərə çıxışını genişləndirir, həm də səhiyyə xərcləri və ehtiyaclar barədə proqnozlaşdırma aparmağa imkan verir.
Beləliklə, tibbi xidmət daha əlçatan və effektiv olur".
Ayhan
16:10 16.04.2026
Oxunuş sayı: 601
