Dəm qazından zəhərlənmədən necə qorunmaq olar?
Qazax rayonunda baş verən faciəli hadisə bir daha məişətdə təhlükəsizlik qaydalarına riayət etməyin nə qədər vacib olduğunu göstərir. Rayonun Daş Salahlı kəndində qeydə alınan hadisədə gənc bir qızın həyatını itirməsi cəmiyyətdə dərin təəssüf və narahatlıq doğurub. Bu cür hadisələr xüsusilə qapalı məkanlarda qazdan istifadə zamanı diqqətli olmağın zəruriliyini ön plana çıxarır.
İlkin məlumata görə, hamam otağında baş verən zəhərlənmə faktı dəm qazının görünməz, lakin son dərəcə təhlükəli təsirini bir daha xatırladır. Hadisə ilə bağlı araşdırmalar davam etdirilsə də, bu kimi faciələr insanların gündəlik həyatında təhlükəsizlik tədbirlərinə daha ciddi yanaşmasının vacibliyini açıq şəkildə göstərir.
Məsələ ilə bağlı təhlükəsizlik üzrə ekspert Samir Nəbiyev Crossmedia.az-la öz fikirlərini bölüşüb: "Dəm qazı ilə zəhərlənmənin qarşısını almaq üçün müəyyən təhlükəsizlik tədbirləri mütləq görülməlidir. Mənzillərdə karbonmonoksid (dəm qazı) detektorları quraşdırılmalıdır. Bu cihazlar qaz sızmasını aşkar edərək səsli siqnal vasitəsilə xəbərdarlıq edir. Yaşayış sahələrində, xüsusilə mətbəx və hamam otaqlarında effektiv havalandırma təmin olunmalıdır. Pəncərələrin açıq saxlanılması və baca sistemlərinin işlək vəziyyətdə olması vacibdir. Qaz cihazları, qazanlar, şlanqlar və digər avadanlıqlar ildə ən azı bir dəfə texniki baxışdan keçirilməlidir.Bu tədbirlər dəm qazından boğulma riskini minimuma endirir və insanların həyatını qoruyur".
Elmir Heydərli
10:45 02.04.2026
Oxunuş sayı: 94
