Sağlamlıq haqqında arayış alanlar xəbərdar olsun: Dəyişiklik var
Azərbaycanda bəzi kateqoriya vətəndaşların sosial müdafiəsinin gücləndirilməsi istiqamətində yeni təşəbbüs irəli sürülüb. Təklifə əsasən, ilk dəfə əmək fəaliyyətinə başlayan şəxslərə işə qəbul zamanı tələb olunan sağlamlıq haqqında arayışın rüsum ödənilmədən verilməsi nəzərdə tutulur. Bu məsələ Nazirlər Kabinetinin 2025-ci il üzrə hesabatında öz əksini tapıb və bununla bağlı müvafiq tədbirlərin görülməsi təklif edilib.
Məlum olduğu kimi, hazırda işə qəbul prosesində təqdim olunan sağlamlıq haqqında arayış profilaktik tibbi müayinə xarakteri daşıdığı üçün ödənişli hesab olunur və icbari tibbi sığorta paketinə daxil deyil. Bu arayışların verilməsi zamanı terapevt, cərrah, nevropatoloq, oftalmoloq, otorinolarinqoloq, dermatoveneroloq və stomatoloq kimi ixtisaslı həkimlərin müayinələri, həmçinin flüoroqrafiya və qanın ümumi analizi aparılır. Tariflər isə tibbi xidmətlərin maya dəyəri, əhalinin tələbatı, instrumental və laborator müayinələrin həcmi, eləcə də beynəlxalq təcrübə nəzərə alınmaqla müəyyən edilir.
Lakin ilk dəfə iş həyatına başlayan şəxslər üçün bu arayışın ödənişli olması müəyyən hallarda əlavə maliyyə yükü yaradır. Bu baxımdan, sağlamlıq arayışının rüsum ödənilmədən verilməsi təşəbbüsü xüsusilə gənclərin əmək bazarına çıxışının asanlaşdırılması və onların sosial müdafiəsinin gücləndirilməsi baxımından əhəmiyyətli addım kimi qiymətləndirilir.
Bu barədə həkim Şahvələd Məmmədov Crossmedia.az-a açıqlama verib:
"Bu günə qədər, təxminən bir ildən artıq müddətdə poliklinikalarda sağlamlıq arayışı ödənişli tibbi müayinə əsasında verilirdi və bunun üçün 41 manat ödəniş tələb olunurdu. Bu səbəbdən əhali arasında müəyyən narazılıqlar yaranırdı. İnsanlar hesab edirdilər ki, icbari tibbi sığorta olduğu halda müayinələrin yenidən ödənişli olması düzgün deyil. Məhz bu narazılıqları nəzərə alaraq qərarın dəyişdirilməsi və sağlamlıq arayışlarının icbari tibbi sığorta hesabına verilməsi əhali arasında kifayət qədər müsbət rəy formalaşdıra bilər".
ReAl partiyasının sədri, iqtisadçı Natiq Cəfərli də məsələyə münasibət bildirib:
"Bu ilk əmək fəaliyyətinə başlayan gənclərə, ilk dəfə işə müraciət edən insanlara aiddir. Onlardan arayışla bağlı heç bir ödəniş alınmayacaqsa bu çox yaxşıdır. İlk müraciətdə rüsum alınmaması ən azından məntiqli qərardır".
Ayhan
15:58 14.03.2026
Oxunuş sayı: 8168
