Bəzi özəl klinikalarda onkoloji xidmət imkanları məhduddur - Həkim
Azərbaycanın səhiyyə sistemində onkoloji xidmətlərin keyfiyyətinin yüksəldilməsi istiqamətində yeni hüquqi və institusional addımlar atılır. Səhiyyə naziri Teymur Musayev bildirib ki, özəl tibb müəssisələrində onkoloji yardımın göstərilməsi üçün xüsusi və ciddi tələblər hazırlanıb və bu sahədə fəaliyyət yalnız müvafiq lisenziyaya malik müəssisələr tərəfindən həyata keçiriləcək. Bu yanaşma onkoloji xidmətlərin standartlaşdırılması və pasiyent təhlükəsizliyinin gücləndirilməsi məqsədi daşıyır.
Nazirin sözlərinə görə, qəbul edilən yeni dəyişikliklər “Əhalinin sağlamlığının qorunması haqqında” və “Onkoloji yardım haqqında” qanunların təkmilləşdirilməsi ilə əlaqədardır və bu sənədlər İlham Əliyev tərəfindən imzalanıb. Yeni tələblərə əsasən, yalnız onkoloji yardım üzrə lisenziyası olan özəl tibb müəssisələri bu sahədə xidmət göstərə biləcək ki, bu da ölkədə ixtisaslaşmış tibbi xidmətlərin keyfiyyətinə nəzarətin daha da gücləndirilməsinə xidmət edir.
Məsələ ilə bağlı tibb elmləri doktoru, həkim onkoloq Fərid Museyibov Crossmedia.az-la öz fikirlərini bölüşüb:
"Qeyd etmək lazımdır ki, bu istiqamətdə islahatlar artıq bir sıra qonşu ölkələrdə, o cümlədən Türkiyədə və digər region dövlətlərində uzun müddətdir həyata keçirilir. Onkoloji xəstəliklər təkcə bizim ölkə üçün deyil, bütövlükdə dünya üçün aktual problem olaraq qalır və son illərdə bu xəstəliklərin artım tempi sürətlənmişdir. Məlumdur ki, onkoloji xəstəliklərlə mübarizədə ən effektiv vasitələrdən biri erkən diaqnostikadır. Lakin bu yükün yalnız dövlət tibb müəssisələrinin üzərinə düşməsi praktiki baxımdan çətinliklər yaradır. Bu baxımdan, onkoloji xidmətlərin həm dövlət, həm də özəl tibb müəssisələrində göstərilməsi müsbət və zəruri addım kimi qiymətləndirilməlidir.
Onu da qeyd etmək vacibdir ki, onkoloji pasiyentlər digər xəstəliklərdən əziyyət çəkən pasiyentlərdən müalicə prosesinin mürəkkəbliyi ilə fərqlənirlər. Bir çox hallarda digər xəstəliklərdə cərrahi müdaxilə ilə müalicə prosesi yekunlaşdığı halda, onkoloji xəstəliklərdə müalicə əməliyyatdan sonra da davam edir. Belə ki, pasiyentlərə kimyaterapiya, şüa terapiyası, bəzi hallarda isə ağrıkəsici və dəstəkləyici müalicə təyin olunur. Çox vaxt bu müalicə üsulları kompleks şəkildə tətbiq edilir. Bu səbəbdən onkoloji xidmətin təşkili yüksək ixtisaslı və təcrübəli kadrların mövcudluğunu tələb edir. Onkologiya sahəsində fəaliyyət göstərmək üçün mütləq şəkildə ixtisaslaşmış mütəxəssislər olmalıdır. Eyni zamanda, bəzi özəl tibb müəssisələrində qeyd olunan müalicə metodlarının hamısının tətbiqi üçün zəruri şərait və imkanlar mövcud deyil".
Onun fikrincə, bu sahə xüsusi diqqət və məsuliyyət tələb edir: "Çünki kimyaterapiyanın tətbiqi ciddi tibbi prosedur olmaqla yanaşı, potensial risklər daşıyır və müvafiq qaydalara ciddi riayət edilməsini tələb edir. Bu prosedurun aparılması üçün həm peşəkar tibbi heyət, həm də xüsusi texniki və təhlükəsizlik standartları təmin edilməlidir. Bundan əlavə, onkoloji xəstəliklərin diaqnostikası üçün müasir tibbi avadanlıqların — məsələn, MRT və KT müayinələrinin — mövcudluğu vacib şərtlərdəndir. Bəzi özəl klinikalarda bu avadanlıqların olmaması onların onkoloji xidmət göstərmə imkanlarını məhdudlaşdırır. Nəticə etibarilə, yalnız müvafiq kadr potensialına, texniki təchizata və normativ tələblərə cavab verən özəl tibb müəssisələri bu sahədə fəaliyyət göstərmək üçün lisenziya əldə edə biləcəklər. Bu isə həm pasiyentlərin təhlükəsizliyinin təmin olunmasına, həm də onkoloji xidmətlərin keyfiyyətinin yüksəldilməsinə xidmət edəcəkdir".
Elmir Heydərli
12:00 02.03.2026
Oxunuş sayı: 652
