Artan körpə ölümlərinin əsas səbəbləri açıqlandı
Gəncə şəhərində azyaşlının ölümü ilə nəticələnən hadisə qeydə alınıb. Məlumata görə, 2023-cü il təvəllüdlü uşaq ağır vəziyyətdə tibb müəssisəsinə çatdırılıb və dərhal hospitalizasiya olunub.
Rəsmi açıqlamaya əsasən, azyaşlıya dəqiqləşdirilməmiş sepsis və ağciyər çatışmazlığı diaqnozu qoyularaq müalicəsi reanimasiya şöbəsində aparılıb. Həkimlərin bütün səylərinə və görülən zəruri reanimasiya tədbirlərinə baxmayaraq, qısa müddət sonra uşağın bioloji ölüm faktı qeydə alınıb.
Körpə ölümləri barədə tibb elmləri doktoru, professor Adil Qeybulla Crossmedia.az-la öz fikirlərini bölüşüb:
"Körpə ölümləri dedikdə, tibbi dildə neonatal ölümlər – yəni yeni doğulmuşun həyatının ilk 28 günü ərzində baş verən ölümlər nəzərdə tutulur. Statistik göstəricilərə görə bu ölümlərin böyük hissəsi, təxminən üçdə ikisi, hətta 75 faizə qədəri ilk həftəyə təsadüf edir. Ümumilikdə isə doğuşdan sonrakı 28 gün ərzində baş verən ölümlər neonatal ölüm kimi qiymətləndirilir.
Bu halların əsas səbəbləri müxtəlif ola bilər. İlk növbədə vaxtından əvvəl doğuşlar mühüm rol oynayır, çünki belə hallarda körpənin orqanizmi yetkin olmur və xarici mühitə adaptasiya etməkdə çətinlik çəkir. Bundan başqa, doğuş travmaları, asfiksiya (boğulma halları) da mühüm risk faktorları sırasındadır. Bəzi hallarda doğuş zamanı döl yanı mayenin aspirasiyası, ciftin boğaza dolaşması və ya oksigen çatışmazlığı nəticəsində asfiksiya baş verə bilər.
Digər səbəblər sırasında infeksiyalar, ağır anadangəlmə qüsurlar, xüsusilə ürək qüsurları qeyd olunmalıdır. Belə qüsurlar bəzən körpənin doğulduqdan sonra ətraf mühitə uyğunlaşmasına mane olur və həyatla uzlaşmayan patologiyalara səbəb ola bilər. Bundan əlavə, bir yaşa qədər uşaqlarda müşahidə edilən qəfil uşaq ölümü sindromu da mövcuddur ki, bu zaman uşaq yuxu zamanı vəfat edir və çox vaxt konkret səbəb tam müəyyən edilə bilmir. Ümumiyyətlə, həyatın ilk həftəsində baş verən ölümlər əsasən erkən neonatal ölümlər hesab olunur və onların səbəbləri müxtəlif ola bilər".
Onun sözlərinə görə, konkret ölüm səbəbinin dəqiq müəyyənləşdirilməsi isə yalnız məhkəmə-tibbi ekspertizanın rəyindən sonra mümkündür: "Ekspertiza nəticəsində ölümün döl yanı maye ilə bağlı asfiksiya, doğuş travması, infeksiya və ya anadangəlmə qüsurlar kimi hansı amillə əlaqədar olduğu aydınlaşdırıla bilər. Körpə ölümlərinin statistikası son dərəcə ciddi göstərici hesab olunur və mütləq şəkildə hərtərəfli araşdırılmalıdır. Çünki hamiləliyin düzgün planlaşdırılması, hamiləlik dövrünə tibbi nəzarət və keyfiyyətli doğuş xidməti sonda sağlam və uğurlu doğuşun əsas müəyyənedici amilləridir".
Elmir Heydərli
09:30 25.02.2026
Oxunuş sayı: 561
