Yaşıl Bakıya doğru: Sökülən binaların yerində parkların salınması təqdirəlayiqdir
“Prezident İlham Əliyevin müvafiq Sərəncamı ilə 2026-cı ilin “Şəhərsalma və Memarlıq İli” elan edilməsi şəhərsalma, şəhər təsərrüfatı ilə məşğul olan qurumların üzərinə böyük məsuliyyət qoyur”.
Bunu Buzovna bələdiyyə sədrinin müavini Təbriz Ağayev Crossmedia.az-a açıqlamasında deyib. Onun sözlərinə görə, son illər paytaxt Bakıda və ölkəmizin digər şəhərlərində gözəlliyi zövq oxşayan binalar inşa edilib, nəhəng infrastruktur layihələr icra olunub, yeni nümunəvi məhəllələr salınıb.
“Bakıda ölkə başçısı cənab İlham Əliyevin təşəbbüsü ilə 400-dən çox park salınıb. Mədəniyyət və istirahət parklarında paytaxt sakinlərinin və turistlərin asudə vaxtını səmərəli keçirməsi üçün əlverişli şərait yaradılıb. Bu gün artıq Bakı da dünyada parklar şəhəri kimi tanınır və bu sahədə görülən işlər nəticəsində paytaxtımız dünyanın bir çox möhtəşəm şəhərlərini geridə qoyub. Şəhərimizə gələn turistlərin sayının ilbəil artması düşünülmüş və məqsədyönlü siyasət nəticəsində Bakının sürətli inkişafının sübutudur. Prezident İlham Əliyevin müvafiq Sərəncamı ilə Mərkəzi Nəbatat parkında təmir və yenidənqurma işləri başa çatıb. Xəzər rayonu ərazisində, Mərdəkanda yerləşən Dendrologiya parkında əsaslı təmir-yenidənqurma işləri davam etdirilir. Yaxın gələcəkdə Bakıda 10 meqaparkın yaradılması nəzərdə tutulur. Parklarda şəhər sakinlərinin və turistlərin istirahəti üçün hər cür şərait yaradılıb, müasir idman və uşaq əyləncə qurğuları quraşdırılıb. Vurğulamaq yerinə düşər ki, dövlət başçısının göstərişi ilə icra edilən infrastruktur layihələri ekoloji düşüncəyə əsaslanır. Görülən işlər paytaxt sakinlərinin rifah halının yaxşılaşdırılmasına, sosial şəraitinin yüksəldilməsinə xidmət edir. Bakıda “yaşıl nəqliyyata” keçid istiqamətində əhəmiyyətli addımlar atılıb. Paytaxtın əksər ərazilərində velosiped zolaqları yaradılıb, skuterlərin hərəkəti asanlaşdırılıb. Təkcə son 2 il ərzində mikromobillik infrastrukturunun inkişaf etdirilməsi məqsədilə əhəmiyyətli layihələr həyata keçirilib. Ötən il 15 küçə və prospektdə, həmçinin 2 ərazidə 15 kilometr mikromobillik zolağı çəkilib. Paytaxtın ictimai nəqliyyatında elektriklə işləyən nəqliyyat vasitələrinin sayı artırılıb”-deyə, o, bildirib.
Onun sözlərinə görə, sökülən binaların yerində parkların salınması təqdirəlayiq haldır:
“Son illər Bakıda həyata keçirilən geniş tikinti-quruculuq işləri çərçivəsində bir çox yerlərdə istismar müddəti bitmiş, qəzalı bina və tikililər sökülür. Təqidərlayiq haldır ki, sökülən tikililərin yerinə yaşayış binası, inzibati bina, ticarət və iaşə obyektlər tikilmir, istirahət və mədəniyyət parkları salınır. Neftlə çirklənmiş ərazilərdə parkların salınması da şəhərsalmada Azərbaycanın tətbiq etdiyi ənənədir və alqışa layiqdir. Yəqin ki, 2026-cı il “Şəhərsalma və Memarlıq İli”ndə də Bakımızın daha da gözəlləşdirilməsi və yaşıllaşdırılması istiqamətində işlər uğurla davam etdiriləcək. “Şəhərsalma və Memarlıq İli” Qarabağa böyük qayıdış prosesi yəqin ki, əsas diqqət mərkəzində olacaq. İşğaldan azad edilmiş torpaqlarda Azərbaycan xalqının minillər ərzində formalaşmış milli memarlıq ənənələrinə və müasir şəhərsalma standartlarına uyğun tikililər inşa ediləcək, yeni şəhər və qəsəbələr salınacaq. Bakının Xəzər rayonunun Buzovna qəsəbəsində istər 2024-cü il “Yaşıl dünya naminə həmrəylik ili”ndə, istərsə də 2025-ci il “Konstitusiya və suverenlik ili”ndə tikinti-quruculuq, bərpa və yenidən qurma, abadlıq işləri görülüb. Görülən işlərin əsas məqsədi Abşeronun milli incəsənət ruhunu yaşatmaq, qəsəbənin, rayonun və bütövlükdə Bakı şəhərinin simasını daha da gözəlləşdirməkdir. Bu günə qədər ekoloji fəalların, vətəndaş cəmiyyəti təmsilçilərinin iştirakı ilə təkcə Buzovna qəsəbəsində 80-ə yaxın iməcilik aksiyası keçirilib. İctimai fəallarla birgə ağacəkmə aksiyaları, ətraf ərazilərin, o cümlədən Xəzər sahilinin məişət tullantılarından təmizlənməsi aksiyaları həyata keçirilib. Bütün bunlarda məqsəd paytaxtımızın gözoxşayan məkana çevrilməsidir”.
10:26 27.01.2026
Oxunuş sayı: 182
