Körpə ölümləri niyə artır? - Səbəblər və həll yolları açıqlandı
Xırdalanda 1 yaşlı körpə ölüb.
Hadisə ötən gün Xırdalan şəhəri Abşeron Gənclər şəhərciyində qeydə alınıb.
2025-ci il təvəllüdlü Arif Osmanzadənin inkişafdan qaldığı üçün öldüyü bildirilir.
Faktla bağlı araşdırmalar aparılır.
Uşağın inkişafdan qalması səbəbi ilə ölməsi, tibbi nəzarətin və müalicə imkanlarının vacibliyini bir daha göstərir. Araşdırmaların düzgün aparılması və oxşar halların qarşısının alınması önəmlidir.
Körpə ölümlərinin əsas səbəbləri barədə Crossmedia.az-a danışan tibb elmləri doktoru, professor Adil Qeybulla bildirib ki, körpə ölümlərinin böyük bir hissəsi hamiləliyin gedişi və ananın sağlamlıq vəziyyəti ilə bağlıdır: "Təəssüf ki, bu gün fizioloji cəhətdən tam normal keçən hamiləliklərə çox az rast gəlinir. Bunun əsas səbəblərindən biri anaların çox vaxt əvvəlcədən müayinə olunmadan hamilə qalmasıdır. Bu, bəzən planlaşdırılan, bəzən isə arzu olunmayan hamiləliklərdə baş verir. Arzu olunmayan hamiləlik zamanı ondan qurtulmağa cəhd edilir, sonra fikir dəyişir və hamiləliyin saxlanması üçün müxtəlif tədbirlər görülür. Bu isə hamiləliyin normal inkişafına mənfi təsir göstərir. Bəzi hallarda ananın yanaşı xəstəlikləri və sağlamlıq problemləri olur və o, bunları hamilə qaldıqdan sonra öyrənir. Bu zaman artıq gec olur. Bir çox qadın hamilə qalır, lakin yalnız doğuşa yaxın vaxtlarda həkim axtarmağa başlayırlar. Hamiləlik dövründə bir dəfə də olsun müayinədən keçməyən analar var ki, bu da günümüzün acı reallıqlarındandır".
Professor söyləyib ki, bu, ilk belə hadisə deyil: "Əvvəllər də belə hallar olub, lakin o dövrdə insanlar daha sağlam idilər, fiziki aktivlik yüksək idi. İndiki dövrdə isə insanların sağlamlıq göstəriciləri əvvəlki kimi deyil. Hazırda virus infeksiyalarına, xüsusilə də virus hepatitlərinə — hepatit B və C-yə tez-tez rast gəlinir. Bu xəstəliklər qaraciyəri zədələyir və hamiləlik fonunda ağır fəsadlara, hətta ölümə səbəb ola bilir. Bundan əlavə, müxtəlif yanaşı xəstəliklər, vitamin və mineral çatışmazlıqları da mövcud ola bilər. Buna baxmayaraq, hamiləlik baş verir və ağır fizioloji gedişlə davam edir. Nəticədə hamiləliyin sonunda ciddi problemlər yaşanır".
Onun fikrincə, hamiləlik dövründə respirator infeksiyalar arzuolunan deyil: "Uşaqlıq yolu infeksiyaları və dölətrafı mayenin bulanması da risk faktorları sırasındadır. Səbəblər çoxdur və hamısını sadalamaq mümkün deyil. Ancaq bir məqam mütləq nəzərə alınmalıdır: körpə ölümlərinin qarşısını almaq üçün hamiləlik mütləq planlaşdırılmalıdır. Bu nə deməkdir? Ana və ata əvvəlcədən müayinə olunmalıdır, xüsusilə ana geniş tibbi yoxlamadan keçməlidir. Onun hamiləliyi daşımaq imkanları tam qiymətləndirilməli və yalnız bundan sonra hamilə qalmasına icazə verilməlidir. Hamiləlik dövründə də ana mütəmadi və planlı şəkildə nəzarətdə saxlanmalıdır. Dölün inkişafı, dölətrafı mayenin vəziyyəti və ananın ümumi sağlamlıq durumu daim izlənilməlidir. Bu qaydalara əməl edilsə, sağlam uşaqların dünyaya gəlməsi halları xeyli artar. Hazırda isə görürük ki, bəzi uşaqlar serebral iflic kimi ağır xəstəliklərlə doğulurlar. Bu gün uşaq ailə üçün ölkədən də dəyərli hesab olunur. Talassemiya məsələsində müəyyən tədbirlər görülüb, mərkəzlər fəaliyyət göstərir və bu xəstəliyin qarşısı qismən alınıb. Lakin yenə də hamiləliyin gedişi ciddi nəzarətdə olmalıdır. Doğuşdan sonra uşaqlara milli peyvənd təqviminə uyğun olaraq bütün peyvəndlər vurulmalıdır. Təəssüf ki, bəzi valideynlər bundan da imtina edirlər. Bu isə son nəticədə müxtəlif xəstəliklərin yayılmasına və uşaq itkilərinə səbəb olur. Məsələn, qızılca zamanı bunun acı nəticələrini gördük. Valideynlər yalnız problem yarandıqdan sonra peyvəndə üz tutmamalıdırlar. Milli peyvənd təqvimi Dünya Səhiyyə Təşkilatının tövsiyələri əsasında hazırlanıb və aparıcı tibb mərkəzləri tərəfindən təsdiqlənib. Bu sistemə əməl etmək vacibdir. Məhz bunun nəticəsində bu gün kütləvi uşaq ölümləri ilə qarşılaşmırıq".
Ülvi Zahidov
11:20 16.01.2026
Oxunuş sayı: 1218
