Vərəm xəstələri üçün ayrıca hemodializ kabinetlərinin yaradılması xüsusi əhəmiyyət kəsb edir - Açıqlama
Azərbaycanda səhiyyə sisteminin davamlı inkişafı və ixtisaslaşmış tibbi xidmətlərin genişləndirilməsi istiqamətində mühüm addımlar atılmaqdadır. Xüsusilə həssas xəstə qruplarının müalicə imkanlarının yaxşılaşdırılması, onların təhlükəsizliyinin və komfortunun təmin edilməsi dövlətin səhiyyə siyasətində prioritet istiqamətlərdən biridir.
Bu baxımdan, ölkəmizdə ilk dəfə olaraq vərəm xəstəliyindən əziyyət çəkən və eyni zamanda xroniki böyrək çatışmazlığı olan pasiyentlər üçün xüsusi hemodializ kabinetinin yaradılması mühüm sosial və tibbi əhəmiyyət daşıyan yenilik kimi qiymətləndirilir. Sözügedən təşəbbüs həm infeksion təhlükəsizliyin təmin olunması, həm də bu kateqoriyadan olan xəstələrin kompleks müalicəyə çıxış imkanlarının artırılması baxımından səhiyyə sahəsində keyfiyyətcə yeni mərhələnin başlanğıcıdır.
Məsələ ilə bağlı həkim, tibb elmləri doktoru Fərid Museyibov Crossmedia.az-la öz fikirlərini bölüşüb:
"Əvvəlcə qeyd etmək istərdim ki, hemodializ xəstələri əsasən xroniki böyrək çatışmazlığından əziyyət çəkən şəxslərdir. Bu xəstələr üçün xüsusi xəstəxanalar və ayrıca hemodializ otaqları fəaliyyət göstərir. Pasiyentlər həftədə bir, iki və ya üç dəfə hemodializ proseduruna cəlb olunurlar. Sözügedən proses orta hesabla 4–5 saat davam edir və bu müddət ərzində aparat böyrəyin funksiyasını müvəqqəti olaraq əvəz edir.
Eyni zamanda, vərəm xəstələri üçün ayrıca hemodializ kabinetlərinin yaradılması xüsusi əhəmiyyət kəsb edir. Burada əsas məqsəd vərəm xəstəliyi daşıyıcılarının digər dializ alan xəstələrlə təmasının tam aradan qaldırılması və hemodializ prosesinin təhlükəsiz, rahat şəkildə həyata keçirilməsidir.
Məlum olduğu kimi, vərəm yoluxucu xəstəlikdir və bu xəstələrin immun sistemi zəif olur. Böyrək çatışmazlığı ilə yanaşı vərəm xəstəliyinin mövcudluğu pasiyentin vəziyyətini daha da ağırlaşdırır. Bu baxımdan, onlar üçün ayrıca hemodializ kabinetlərinin təşkili həm tibbi təhlükəsizliyin təmin edilməsi, həm də digər xəstələrin qorunması baxımından olduqca məqsədəuyğun və müsbət bir təşəbbüs hesab olunur".
Elmir
09:55 10.01.2026
Oxunuş sayı: 2500
