Xarici xəbərlər

Ukrayna Rusiyanın raket zərbələri ilə bağlı BMT və NATO-ya müraciət edir

Ukrayna Rusiyanın Lvov vilayətinə “Oreşnik” adlı raketdən istifadə etməsi ilə bağlı BMT Təhlükəsizlik Şurasının və Ukrayna–NATO Şurasının təcili iclasının çağırılmasını təşəbbüs edib.

Crossmedia.az xarici KİV-ə istinadən xəbər verir ki, bu barədə Ukraynanın xarici işlər naziri Andriy Sibiqa X sosial şəbəkəsində yazıb.

Nazirin sözlərinə görə, Rusiya Lvov vilayətinə orta mənzilli ballistik raket tətbiq etdiyini iddia edir və bu zərbə Aİ və NATO sərhədlərinə yaxınlığı ilə Avropa qitəsinin təhlükəsizliyi üçün ciddi təhdid yaradır. O qeyd edib ki, Kiyev Rusiyanın “təhlükəli və məsuliyyətsiz addımlarına” qəti cavab tələb edir.

Sibiqa bildirib ki, ABŞ, Avropa tərəfdaşları və beynəlxalq təşkilatlar diplomatik kanallar vasitəsilə hücumun detalları barədə məlumatlandırılır. Ukrayna XİN rəhbəri həmçinin Rusiyanın zərbəni guya “Putinin iqamətgahına hücum” iddiası ilə əsaslandırmasını absurd adlandırıb.

Nazirin fikrincə, bu açıqlama Moskvanın terror və müharibə üçün real səbəblərə ehtiyac duymadığının növbəti sübutudur.

Fatimə Məmmədova

🖨 Çap et

12:35 09.01.2026

Oxunuş sayı: 1650