Uşaqlara yeni il hədiyyəsi alarkən nələrə diqqət etməliyik?- Ekspert açıqladı
Yeni il ərəfəsində müxtəlif yarmarkalar qurulur, endirimlər edilir. Müəyyən marketlərdə də uşaqlara maraqlı gələ biləcək hazır hədiyyə paketləri yığılır. Belə ki, bu hədiyyə paketlərinin içərisində müəyyən şirnilər, uşaqların xoşuna gələcək qida məhsulları olur. Bu tip hədiyyə paketlərinin hazırlanması müəyyən qədər valideynlərin işini rahatlaşdırıb, uşaqları sevindirsə də özü ilə müəyyən şübhələr də gətirir. Məsələn hazırlanan hədiyyə paketi tərkibində olan qidaların son istifadə müddətinə diqqət edilməli, marketdə saxlanıldığı müddətə diqqət edilməlidir. Bəs sonrakı mərhələdə, valideynlər bu hədiyyəni aldıqdan sonra nəyə diqqət etməli, hansı şəraitdə saxlamalıdır?
Məsələ ilə bağlı təhlükəsizlik eksperti Seymur Qafarov Crossmedia.az-a açıqlama verib:
"Bildiyiniz kimi, dünya ölkələrində olduğu kimi Azərbaycanda da Yeni il bayramı ərəfəsidir. Bu dövrdə xüsusilə pərakəndə satış sahəsində fəaliyyət göstərən obyektlərdə, market şəbəkələrində, eyni zamanda uşaqlar üçün nəzərdə tutulan müxtəlif şənliklərdə əvvəlcədən hazırlanmış hədiyyə qutularına geniş şəkildə rast gəlinir. Bu qutuların tərkibinə əsasən müxtəlif oyuncaqlar, qənnadı məmulatları, şokoladlar və peçenyalar daxil edilir.
Lakin bu cür hədiyyə qutularını alarkən- istər mağazalardan, istər tədbirlərdən, istərsə də gündəlik istifadə məqsədilə- uşaqlar üçün əldə edilərkən bir sıra qida təhlükəsizliyi məsələlərinə diqqət yetirilməlidir. Ən vacib məqamlardan biri qutuların içərisində olan məhsulların köhnə olması, yəni istehsal tarixindən deyil, son istifadə tarixinin keçmiş olma riskidir. Bu baxımdan “Qida təhlükəsizliyi haqqında” qanunun 17.3-cü maddəsinin tələblərinə əsasən, məhsulların üzərindəki etiket məlumatları ilə tanış olmaq və son istifadə tarixi keçmiş məhsulların alınmasından çəkinmək vacibdir.
Eyni zamanda bayram ərəfəsində uşaqların gündəlik qida rasionuna uyğun olaraq bu məhsulların hamısının birdən deyil, tədricən istifadə olunması tövsiyə edilir. Ümumilikdə şokoladlar, müxtəlif qatqı maddələri, emulqatorlar, stabilizatorlar və dad gücləndiriciləri əlavə edilmiş qənnadı məmulatlarının istifadəsindən mümkün qədər uzaq durmaq məqsədəuyğundur.
Mütəxəssislərin tövsiyəsinə görə, bu cür məhsullar əvəzinə, orijinal şokolada batırılmış meyvələrdən, meyvə qurularından və ümumilikdə qurudulmuş meyvələrdən istifadə uşaqların həm əqli, həm də fiziki inkişafına müsbət təsir göstərə bilər.
Hədiyyə qutularının tərkibindəki məhsullara baxış zamanı deformasiya, qabarma, şişmə və xüsusilə şokolad məhsullarında quruma müşahidə olunursa, bu, məhsulun köhnə olmasına və ya düzgün saxlanılmamasına dəlalət edir. Buna görə də bu məhsullar ev şəraitində birbaşa işıqla təmasda olan yerlərdə saxlanmamalı, xüsusilə mağazaların güclü işıqlandırması altında uzun müddət qalmamalıdır".
Ekspert əlavə edib ki, daha məqsədəuyğun variant məhsulların soyuducuda saxlanılması və qısa müddət ərzində istehlak edilməsidir:
"Həmçinin hədiyyə qutularındakı məhsulların hamısının birdən uşaqlara verilməməsi, istehlak zamanı onların eyni anda meyvə şirələri və digər şirin içkilərlə birlikdə qəbul edilməsindən çəkinilməsi tövsiyə olunur. Bu cür vərdişlər gələcəkdə uşaqlarda diabet riskinin artmasına səbəb ola bilər.
Digər mühüm məqamlardan biri də qablaşdırma materiallarının bütövlüyüdür. Qablaşdırmanın zədələnməsi məhsulun çirklənməsinə, müxtəlif xoşagəlməz halların yaranmasına şərait yarada bilər. Buna görə də daşınma zamanı qablaşdırmanın açılmamasına, dağılmamasına və məhsulun içinə hər hansı zərərvericinin daxil olmamasına diqqət yetirilməlidir".
Ayhan
10:12 23.12.2025
Oxunuş sayı: 1391
