Onkoloji xəstələlər icbari tibbi sığorta ilə müalicə olacaq: Həkim alqışladı
2027-ci ildən uşaq və yeniyetmələrdə onkoloji xəstəliklərin müalicəsinin icbari tibbi sığorta hesabına aparılması ölkəmizin səhiyyə sistemində mühüm dönüş nöqtəsi kimi qiymətləndirilir. Bu addım həm sosial müdafiə baxımından, həm də səhiyyə xidmətlərinin əlçatanlığı nöqteyi-nəzərindən ciddi irəliləyiş sayıla bilər. Çünki onkoloji xəstəliklərin həm diaqnostikası, həm də müalicəsi yüksək maliyyət tələb edir və bir çox ailələr üçün ağır maddi yük yaradır. Dövlətin bu məsuliyyəti üzərinə götürməsi isə ən həssas qrup olan uşaqların və yeniyetmələrin sağlamlığının qorunmasına, həmçinin ailələrin iqtisadi yükünün azalmasına mühüm töhfə verəcək.
Mövzu ilə bağlı Tibb üzrə fəlsəfə doktoru, həkim - onkoloq Fərid Museyibov Crossmedia.az-a açıqlama verib: "Bunu böyük bir uğur kimi qiymətləndirirəm. Çünki bildiyimiz kimi, onkoloji xəstəliklər həm ölkəmizdə, həm də bütün dünyada sürətlə yayılır. Təbii olaraq, bu xəstəliklərin müalicəsi və müayinəsi çox bahalı başa gəlir. İlk olaraq qeyd edim ki, son dövrlərdə icbari tibbi sığorta zərfinə bir sıra vacib müayinələr daxil edilib. Buraya MRT, KT (QAT), qastroskopiya, kolonoskopiya və müxtəlif laborator analizlər daxildir. Lakin ən sevindirici məqam odur ki, həm ölkəmiz, həm də səhiyyəmiz üçün mühüm addım atılıb: artıq nəzərdə tutulur ki, 2027-ci ildən etibarən onkoloji xəstəlikdən əziyyət çəkən uşaq və yeniyetmələrin ilkin mərhələdən etibarən müayinəsi və müalicəsi icbari tibbi sığorta hesabına həyata keçiriləcək".
Onkoloq, həmçinin qeyd edib ki, bunu birdən-birə tam şəkildə tətbiq etmək mümkün deyil: "Çünki onkoloji xəstəliklərin həm müalicəsi, həm də müayinəsi çox yüksək maliyyət tələb edir. Digər xəstəliklərlə müqayisədə bu proses daha bahalıdır. Bəzi xəstələrə ikinci və üçüncü qrup əlillik verildiyi üçün həm müalicə, həm də sonrakı reabilitasiya mərhələsi ciddi xərclər tələb edir. Həmçinin elə hallar olur ki, xəstəyə əməliyyatdan sonra xüsusi qulluq göstərən şəxsə də ehtiyac yaranır. Bütün bu məsələlər nəzərə alınmalıdır. İnşallah, mərhələli şəkildə ilk olaraq uşaq və yeniyetmələrin sığorta zərfinə daxil edilməsi nəzərdə tutulur. Yaxın gələcəkdə isə ümid edirik ki, bütün onkoloji xəstələr icbari tibbi sığorta ilə tam əhatə olunacaq".
Ayhan
12:08 10.12.2025
Oxunuş sayı: 1456
