Rəflərdə gizlənən təhlükə: Vaxtı keçmiş qidalar insanları zəhərləyir
Bəzən mağazalarda son istifadə tarixi bitmiş məhsulların satıldığını görürük və bu, sadə bir laqeydlik kimi görünsə də, əslində həm istehlakçı sağlamlığı, həm də hüquqları üçün ciddi təhlükə yaradır. Son vaxtlar bu cür halların artması cəmiyyətdə narahatlıq doğurur, çünki tarixi keçmiş məhsulların istifadəsi zəhərlənmələrdən tutmuş müxtəlif mədə-bağırsaq problemlərinə qədər bir çox fəsada səbəb ola bilər. Mağazaların nəzarətsiz şəkildə bu cür məhsulları satışa çıxarması həm qanuna ziddir, həm də insanların təhlükəsizliyinə açıq təhdid hesab olunur. Burada mövzu təkcə mağazalarda nəzarətsiz satılan bir-iki məhsuldan getmir. Söhbət hər gün yüzlərlə insanın təhlükəsizliyindən, sağlamlığından və istehlakçı kimi hüquqlarından gedir.Mütəxəssislər bildirirlər ki, belə məhsulların tərkibi dəyişir, keyfiyyəti aşağı düşür və ən təhlükəlisi – ciddi zəhərlənmələrə qədər aparan nəticələr yarada bilir.
Qida eksperti Fərid Kazımov Crossmedia.az açıqlamasında bildirib ki, mağazalarda son istifadə tarixi bitmiş məhsulların satılması təhlükəlidir:
"Son istifadə tarixi keçmiş məhsullar bakteriya və mikroorqanizmlərin çoxalması üçün ideal şərait yaradır, bu isə qida zəhərlənməsinə, ishal, qusma, qarın ağrısı və hətta yoluxucu xəstəliklərə səbəb ola bilər. Tarixi keçmiş məhsulların dadı, qoxusu, rəngi və teksturası dəyişir və dünyada, o cümlədən Azərbaycanda mağazaların bu cür məhsulları satması qanunsuzdur, bu həm istehlakçı hüquqlarının pozulmasına, həm də inzibati cərimələrə gətirib çıxarır".
Fərid Kazımov istehlakçılara tövsiyə edib ki, məhsulu alarkən həmişə etiketi və “son istifadə tarixi”ni yoxlasınlar, tarixi gün, ay, il şəklində oxusunlar, məhsulun rəngi, qoxusu və qablaşdırmasının normada olmasına diqqət etsinlər, şişmiş qutular, bulanıq maye və küf ləkələrini xəbərdarlıq siqnalı kimi qəbul etsinlər:
"Tarixi keçmiş qidaların istifadəsi bakterial zəhərlənmələrə, yağların oksidləşməsinə, vitamin və mineral tərkibin azalmasına, həzm sistemi və immunitet üçün zərərə səbəb ola bilər və bu risk hamilələr, uşaqlar, yaşlılar və immuniteti zəif olan şəxslər üçün daha yüksəkdir".
Ekspert son olaraq hər alış-verişdə qablaşdırmanı diqqətlə yoxlamağı, açıq məhsulları tez istehlak etməyi və şübhəli məhsulları geri qaytarmağı və ya mağazaya məlumat verməyi tövsiyə edib.
Azad İstehsalçılar birliyinin sədri Eyyub Hüseynov da Crossmedia.az-a açıqlamasında yararlılıq vaxtı keçmiş məhsulun satışa qanunla qadağan olduğunu bir daha qeyd edib:
" Əgər vətəndaş belə hal görərsə 1003 qaynar telefon xətti ilə Qida Təhlükəsizlik agentliyinə, yaxud (012)-599-76-00 nömrəsinə- dövlət orqanına müraciət edərsə həmin yeri minimum 1500 manat cərimə gözləyir".
E.Huseynov , həmçinin, son istifadə müddəti keçmiş məhsul insanlarda yaratdığı fəsadlarını da bildirib:
" Belə məhsullar insanlarda ciddi mədə-bağırsaq xəstəliklərinə və zəhərlənmələrə səbəb ola bilər".
Fatimə Məmmədova
13:14 09.12.2025
Oxunuş sayı: 934
