Sağlamlıq

Qida zəhərlənmələri artıb?- Ekspertlər həyəcan təbili çalır

İctimai sağlamlıq sahəsində qida təhlükəsizliyi məsələsi xüsusi aktuallıq kəsb edir. Azərbaycan Qida Təhlükəsizliyi Agentliyinin açıqladığı son statistikaya görə, bu ilin ilk 10 ayı ərzində ölkədə 42 təsdiqlənmiş qida zəhərlənməsi hadisəsi qeydə alınıb. Bu hallar nəticəsində ümumilikdə 384 nəfər zərər çəkib.

Məlumatlar göstərir ki, zəhərlənmələrin böyük əksəriyyəti məişət şəraitində baş verib. Xüsusilə konservləşdirilmiş məhsulların istifadəsi zəhərlənmələrin əsas səbəblərindən biridir. Eyni zamanda, ictimai iaşə obyektlərində, xüsusilə dönər və digər qarışıq qidaların istehlakı zamanı da zəhərlənmə halları müşahidə olunur. Sevindirici hal isə odur ki, bu dövrdə qida zəhərlənmələrindən ölüm hadisəsi qeydə alınmayıb.

Tanınmış həkim, onkoloq və tibb üzrə fəlsəfə doktoru Fərid Museyibov Crossmedia.az-a bildirib ki, son zamanlar qida zəhərlənmələrinin sayı artmaqdadır:

“İnsanlar yedikləri yeməyə kifayət qədər diqqət yetirmirlər. Daha çox təzə məhsullardan istifadə olunmalı, mağazadan alınan məhsulların üzərindəki son istifadə tarixinə diqqət yetirilməlidir. Köhnəlmiş qidalardan uzaq durmaq vacibdir, çünki bunlar zəhərlənmənin əsas səbəblərindəndir".

Həkim, həmçinin zəhərlənmə zamanı ilkin yardımın vacibliyini vurğulayıb:

“İlk növbədə təcili tibbi yardıma zəng etmək lazımdır. Hər saniyə həyat üçün önəmlidir. Tez müdaxilə olunsa, xəstə xilas edilə bilər, əks halda ciddi fəsadlar, hətta ölüm riski yaranır. İlk yardım olaraq mədə yuyulmalı və müəyyən dərman preparatlarından istifadə olunmalıdır. Evdə əl altında varsa, mədə ilıq su və ya marqansla yuyula bilər, bağırsaqların təmizlənməsi də zəhərlənmənin qarşısını almağa kömək edir".

Həkimin sözlərinə görə, təcili tibbi yardım gəldikdə həkimlərin göstərişi ilə vena daxili sistemlərdən istifadə olunur, mədə yuyulması və digər müayinələr aparılır ki, xəstənin həyatı üçün önəmli rol oynayır.

Qida eksperti Fərid Səfərov isə bildirib ki, son 10 ayda qida zəhərlənmələrinin artması bir neçə səbəblə bağlıdır: “İsti hava, bakteriyaların sürətlə çoxalması, qidaların düzgün saxlanmaması, restoran və küçə yeməklərində gigiyena boşluqları əsas amillərdir. Suyun düzgün təmizlənməməsi, evdə yemək bişirmənin azalması və bazarda saxta məhsulların artması da riskləri yüksəldir. Həm evdə, həm də iaşə obyektlərində gigiyena qaydalarına ciddi riayət edilməsini tövsiyə edib”.