“Fast Food” qidalar baha başa gəlir: Kütləvi zəhərlənmələr nəyə işarədir?
Türkiyədə iki gün əvvəl 50 şagirdin eyni anda qida zəhərlənməsi ilə xəstəxanaya yerləşdirilməsi bir daha göstərdi ki, qida təhlükəsizliyi məsələsi təkcə gigiyenik tələb deyil, həm də ictimai sağlamlıq üçün strateji önəm daşıyan mövzudur. Belə kütləvi zəhərlənmələr adətən qidanın hazırlanması, saxlanması və daşınması zamanı yol verilən ciddi səhvlərin nəticəsi olur. Hər bir iaşə obyekti üçün sadə görünən qida qaydalarına əməl edilməməsi onlarla uşağın, tələbənin və vətəndaşın sağlamlığını bir anda riskə ata bilər. Bu cür hallarda əsas suallar ortaya çıxır: Qida zəhərlənmələrinin əsas səbəbləri nələrdir və belə vəziyyətdə ilk müdaxilə necə olmalıdır? Məhz bu suallar həm valideynlərin, həm də ictimaiyyətin əsas narahatlıq mövzusuna çevrilib.
Mövzu ilə bağlı səhiyyə eksperti Şahvələd Məmmədov Crossmedia.az-a açıqlama verib:
"Türkiyədə baş verənləri mən də eşitmişəm. Üstəlik, hadisənin bilavasitə tələbələr arasında yayılması onu göstərir ki, həmin yaşayış müəssisəsində – istər dönərxana olsun, istər yeməkxana – qidanın hazırlanması prosesində hər hansı bir səhvə yol verilib. Qida maddəsinin düzgün hazırlanması, saxlanması və ya istifadə olunan məhsulların keyfiyyəti ilə bağlı pozuntu ehtimalı yüksəkdir".
Həkim qeyd edib ki, xüsusilə günəş altında qalan mayonezin yenidən istifadəsi, artıq reaksiya vermiş məhsullarla salat hazırlanması və ya ümumiyyətlə dönərin tərkibində istifadə olunan komponentlərin düzgün saxlanmaması kütləvi zəhərlənməyə səbəb ola bilər: "Mən dəqiq onların nədən zəhərləndiyini bilmirəm, amma qida zəhərlənmələri çox vaxt hazırlanma texnologiyasına düzgün əməl olunmaması nəticəsində baş verir. Kütləvi qida zəhərlənmələri o deməkdir ki, eyni vaxtda eyni yemək üçün hazırlanan qidanın hər hansı bir komponentində sanitar qaydalar pozulub. Məsələn, mayonezin səhv saxlanması, süd məhsullarının düzgün temperatur rejimində olmaması bu tip hallara tez-tez səbəb olur".
Ekspert son olaraq bildirib ki, istənilən halda bu məsələ ilə Qida Təhlükəsizliyi Agentliyi məşğul olmalıdır: "Dönərxanalar və tələbələrin istifadə etdiyi yeməkxanalar mütəmadi olaraq yoxlanmalı, qida təhlükəsizliyi tələblərinə ciddi əməl olunmalıdır".
Ayhan
19:27 24.11.2025
Oxunuş sayı: 2153
