TDT ölkələrinin diaspor qurumlarının rəsmiləri üçün II təcrübə proqramı başa çatıb
Türk Dövlətləri Təşkilatına üzv və müşahidəçi ölkələrin diaspor qurumlarının rəsmiləri üçün II “INTERNSHIP” (təcrübə) proqramı başa çatıb. İştirakçılar proqram çərçivəsində Diasporla İş üzrə Dövlət Komitəsində olublar.
Crossmedia.az Dövlət Komitəsinə istinadən xəbər verir ki, onlara qurumun strukturu, həyata keçirilən layihələr və iş prosesi barədə məlumat verilib.
Qonaqlar, eyni zamanda, “Diaspor TV”nin studiyası ilə tanış olublar. Onlara televiziyanın fəaliyyəti, yayımlanan proqramlar və media işinin diaspor siyasətində rolu haqqında danışılıb. İştirakçılar “Diaspor TV”-yə müsahibə verərək səfərləri və “INTERNSHIP” proqramı ilə bağlı təəssüratlarını bölüşüblər.
Heydər Əliyev Mərkəzində Türk Dövlətləri Təşkilatına üzv və müşahidəçi ölkələrin diaspor qurumlarının rəsmilərinə Ulu Öndərin həyat və fəaliyyətdən geniş bəhs edilib, aidiyyəti eksponatlar göstərilib.
Rəsmilər, həmçinin Bakı Beynəlxalq Multikulturalizm Mərkəzində olub, icraçı direktorla görüşüblər. Onlar Azərbaycanın çoxmədəniyyətli dəyərləri və multikulturalizm siyasəti, eləcə də mərkəzin fəaliyyəti haqqında məlumatlandırılıblar.
Xalça Muzeyi və Qobustan Milli Parkında qonaqlar ölkəmizin milli sənət nümunələri və qədim tarixini əks etdirən abidələrlə yaxından tanış olublar.
Xatırladaq ki, Türk Dövlətləri Təşkilatına üzv və müşahidəçi ölkələrin diaspor qurumlarının rəsmiləri üçün II təcrübə proqramının iştirakçıları Qazaxıstan Respublikasının “Otandastar” Fondunun vitse-prezidenti Alibek Jurkadam, Özbəkistan Respublikasının Millətlərarası Münasibətlər və Xaricdəki Soydaşlar məsələləri Komitəsinin nümayəndəsi Sardor Maxamadiyev, Şimali Kipr Türk Respublikasının Xarici İşlər Nazirliyinin Birinci katibi Dilşad Şenol, Türkiyə Respublikasının Xaricdə yaşayan Türklər və Əqrəba İcmaları İdarəsinin nümayəndəsi Ömer Seyithanoğlu və Macarıstanın Xaricdəki Macar İcmalarının Tədqiqat İnstitutunun tədqiqatçısı Daniel Gazsodur.
17:13 20.10.2025
Oxunuş sayı: 1365
