Ukrayna hərəkətə keçdi, Moskvaya PUA hücumları: "Rusiyanı çətin günlər gözləyir" - MÜSAHİBƏ
Bu günlərdə Rusiyanın paytaxtı Moskvaya kütləvi PUA hücumu olub. Moskvaya PUA hücumu göstərir ki, Rusiya paytaxtı belə tam təhlükəsizlikdə deyil. Görünür, müharibə indi açıq - aydın həm də Rusiya ərazisində gedir. ABŞ Prezidenti Donald Trampın vasitəçiliyi ilə müharibənin bitməsi istiqamətində səylərin davam etdiyi bir vaxtda Moskvaya PUA hücumunun məqsədyönlü olması ehtimalı kifayət qədər çoxdur.
Ən diqqətçəkən məqam isə budur ki, PUA hücumunun Ukraynadan, yaxud hansısa Avropa ölkəsindən həyata keçirilməsi açıqlanmayıb. Və hücumun Avropa dövlətinin təşkil etməsi də mümkündür. Nəzərə almaq lazımdır ki, son zamanlar Rusiya bir sıra Avropa ölkələrinin, o cümlədən Polşa və Ruminiyanın hava məkanını pozmuşdu. Odur ki, müharibənin davam etməsində maraqlı olan Avropa paytaxtlarının birbaşa, yaxud Ukrayna vasitəsilə vəziyyəti daha da gərginləşdirməyə çalışması istisna deyil.
Baş verənlər barədə hərbi ekspert Üzeyir Cəfərov Crossmedia.az-a müsahibə verib:
- Moskvaya PUA hücumları Rusiya daxilində təhlükəsizlik vəziyyətini necə dəyişə bilər?
- Hücum Ukrayna tərəfindən həyata keçirilib və bu, Rusiyanın ciddi narahatlığına səbəb olub. Çünki artıq uzun müddətdir ki, Rusiya paytaxtı bu cür hücumlarla üzləşmirdi. PUA hücumlarının artması təbii ki, Rusiyanı narahat edir. Dünən Rusiya prezidentinin Təhlükəsizlik Şurasının iclasında da Qərbə mesajlar verildi ki, 2026-cı il fevralın 5-də strateji nüvə silahları ilə bağlı müqavilənin müddəti başa çatır və Qərb həmin dövrdə Rusiya ilə yeni danışıqlara getməlidir. Hazırda isə bu məsələ prioritet deyil.Prioritet mövzu BMT Baş Assambleyasının 80-ci sessiyasında ABŞ Prezidenti Donald Trampın Rusiyaya ünvanladığı sərt mesaj idi. O, Rusiyanın Ukraynaya qarşı müharibəni dayandırmalı olduğunu bildirdi. Lakin Moskvanın belə bir fikri yoxdur. Bu isə o deməkdir ki, bundan sonra Moskva, Sankt-Peterburq və digər şəhərlər də PUA və raket hücumlarına məruz qalacaq. Hücumların mərkəzə qədər çatması Rusiyanın daxili təhlükəsizlik sistemində ciddi boşluqlar olduğunu ortaya qoyur və gələcəkdə digər şəhərlərin də hədəfə çevrilə biləcəyini göstərir.
- Bu hücumların arxasında hansı qüvvələrin ola biləcəyi ehtimal olunur?
Aydındır ki, bu hücumların arxasında Ukrayna Baş Kəşfiyyat İdarəsi və Ukrayna Silahlı Qüvvələri dayanır. Onlar da bunu gizlətmirlər. Prosesin hələ başlanğıc mərhələsi olduğu bildirilir.
- PUA hücumlarının artması Rusiya hərbi strategiyasına hansı təsirləri göstərə bilər?
PUA və raket hücumlarının artması Rusiyanın hərbi planlarını çətinləşdirəcək. Artıq Avropa ölkələri Ukraynaya uzaqmənzilli raketlər verir və bu, Rusiyanın həm sərhəd bölgələrində, həm də neft sənaye kompleksində ciddi problemlər yaradır. Nəticədə, Rusiyanın iqtisadiyyatı zəifləyir və müharibəni davam etdirmək daha da çətinləşir. Ukrayna artıq təkcə sərhəd bölgələrində deyil, Rusiyanın neft sənaye kompleksinə də ağır zərbələr endirir. Bu səbəbdən Rusiyada benzin qıtlığı və yanacaq-sürtkü materialları ilə bağlı çətinliklər yaşanır. Ukraynanın gücü hər keçən gün artır. Artıq öz hərbi ehtiyaclarının 60 faizindən çoxunu daxili imkanları hesabına ödəyir. Bu isə Moskvanı daha çox narahat edir. Gözlənilir ki, müharibə gələn ilə qədər də davam edəcək. Çünki Rusiya rəhbərliyi müharibənin dayandırılmasında maraqlı deyil. Müharibə dördüncü ilə yaxınlaşsa da, Moskva hələ də heç bir strateji hədəfə çata bilməyib. Üstəlik, ölkənin iqtisadi imkanları da gündən-günə zəifləyir.
- Belə hadisələr Moskvanın beynəlxalq müstəvidə mövqeyinə necə təsir edə bilər?
- Hadisələrin Moskvanın beynəlxalq mövqeyinə təsirinə gəldikdə isə, demək olar ki, artıq təsir imkanları qalmayıb. Moskva bu gün yalnız üç-dörd ölkə ilə təmasdadır və onlara da qeyri-real tələblər irəli sürür: 2014-cü ildə işğal etdiyi Krım, əlavə olaraq Ukraynanın dörd vilayətinin ilhaqı, eləcə də Ukraynanın NATO-dan uzaqlaşması kimi şərtlər irəli sürülür. Bunların heç biri real deyil. Ukrayna ilə bağlı qərarları yalnız Ukrayna xalqı və siyasi-hərbi rəhbərliyi verə bilər. Ona görə də Avropa ölkələri və NATO Kiyevə dəstək göstərirlər. Çünki Moskva BMT Təhlükəsizlik Şurasının daimi üzvü kimi nüfuzunu itirib və beynəlxalq hüquqa hörmət göstərməyərək başqa ölkənin ərazisinə təcavüz edib. Moskvanın iqtisadi vəziyyəti də çox ağırdır. Şimali Koreya, İran, Çin və bəzən postsovet ölkələrindən müəyyən dəstək alsa da, bu yetərli deyil. Rusiyanın itkiləri böyükdür və rəsmi Moskva bu itkilərdən ciddi narahatdır.
- Bu hücum həm də Rusiyanın hava hücumundan müdafiə sistemlərinin effektsizliyini göstərdi...
- Hava hücumundan müdafiə sistemlərinin səmərəliliyinə gəldikdə isə, əgər min kilometrlərlə məsafədən dron və raketlər Rusiyaya daxil ola bilirsə, yaxud “Pautina” əməliyyatı zamanı 4500 km dərinlikdə hədəflərə zərbə endirilə bilibsə, bu, sistemlərin effektiv olmadığını göstərir. Moskva S-300, S-400, hətta S-500 sistemlərini reklam etsə də, onların praktiki olaraq kifayət qədər səmərəli olmadığı görünür. Əgər PUA-lar Moskvaya qədər gəlib çata biliblərsə, bu, Rusiyanın qarşıdakı dövrdə çox böyük çətinliklərlə üzləşəcəyini göstərir. Məlumatlara görə, Avropa ölkələri Ukraynaya 3500-dən çox uzaqmənzilli raket verib. Onların bir hissəsi artıq çatdırılıb, digər hissəsi isə oktyabrın ilk ongünlüyündə göndəriləcək. Bu, Rusiya üçün çox ciddi nəticələr doğuracaq.
Nicat Rüstəmzadə
12:22 24.09.2025
Oxunuş sayı: 18806
