“Dövlət səviyyəsində narkomaniyaya qarşı tədbirlərin görülməsi müsbət addımdır”- Psixoloq
Ümumi təhsil müəssisələrində psixoloq və tibb işçiləri üçün narkomaniyaya qarşı profilaktika təlimatı hazırlanacaq və təsdiqlənəcək. Bu, 2025–2030-cu illər üçün Dövlət Proqramında nəzərdə tutulub.
Bu addım məktəblərdə narkomaniyaya qarşı profilaktikanın sistemli və peşəkar şəkildə həyata keçirilməsinə şərait yaradacaq. Psixoloq və tibb işçilərinin bu sahədə bilik və bacarıqlarının artırılması uşaqların sağlamlığı üçün əhəmiyyətlidir. Təlimatın tətbiqi həm də erkən mərhələdə risk qruplarını müəyyən etməyə kömək edəcək.
Mövzu ilə bağlı psixoloq Aynur İskəndərova Crossmedia.az-a açıqlama verib.
Psixoloq, narkomaniya ilə bağlı profilaktik təlimatın hazırlanmasının və təsdiq olunmasının təqdirəlayiq olduğunu bildirib:
“Ümumiyyətlə, narkomaniya ilə bağlı olan bəzi özəl təşkilatlar əvvəlki illərdə müəyyən məktəblərdə tədbirlər keçirirdilər. Bundan əlavə, məktəb psixoloqlarının fəaliyyət planında da bu mövzu ilə bağlı profilaktik istiqamətdə tədbirlər nəzərdə tutulur. Yalnız profilaktik deyil, həmçinin diaqnostik və konsultasiya işləri də aparılır.
Bundan başqa, Təhsil Nazirliyi reproduktiv sağlamlıqla bağlı metodik vəsait hazırlayıb. Son üç ildə bu metodik vəsaitlər məktəb psixoloqlarına göndərilir. Məktəb psixoloqları həmin vəsaitlərdən istifadə edərək, Təhsil Nazirliyi tərəfindən əvvəlcədən müəyyən olunmuş tarixlər üzrə plan əsasında iş aparırlar. Hesabat forması da hazırlanaraq məktəblərə göndərilir. Bu vəsaitlərdə reproduktiv sağlamlıqla yanaşı, narkomaniya və zərərli vərdişlərlə bağlı mövzular da geniş yer alır. Proses əsasən VII–IX sinifləri əhatə edir. Lakin məktəb psixoloqları bununla kifayətlənməyərək X–XI siniflərdə də profilaktik, diaqnostik və konsultativ işlər aparırlar.
Qeyd etdiyiniz kimi, profilaktik təlimatın hazırlanması və təsdiq olunması təqdirəlayiqdir. Amma onun nə dərəcədə təsirli olacağı həmin təlimatın mahiyyətindən asılıdır. Yəni təlimat hansı formada hazırlanıb, kimlər tərəfindən hazırlanıb, psixoloqların rəyi və təklifləri nəzərə alınıbmı – bunlar çox vacib məsələlərdir. Təlimatın məzmununu görmədən dəqiq fikir söyləmək çətindir.
Bununla belə, dövlət səviyyəsində məsələyə ciddi yanaşılması və tədbirlər görülməsinə səy göstərilməsi müsbət qiymətləndirilməlidir. Amma təkcə proqramın və ya təlimatın hazırlanması kifayət deyil – onun tətbiqi, bu tətbiqi kimlərin həyata keçirəcəyi, hesabatlılığın olub-olmaması və nəzarət mexanizmləri də çox önəmlidir.
Nəticə etibarilə, bu təlimlərin təsirli olub-olmaması birbaşa təlimatın məzmunundan və onun icrasını həyata keçirən mütəxəssislərdən asılıdır. Hər halda, mövzunun diqqət mərkəzində saxlanılması və tədbirlərin görülməsinə çalışılması müsbət hal kimi dəyərləndirilə bilər”.
Nicat Rüstəmzadə
22:42 18.09.2025
Oxunuş sayı: 1561
