Erməni vitse-spiker Türkiyə ilə münasibətlərdən danışdı: Gizli heç nə qalmayıb
“Mən ümumiyyətlə gənclərə, o cümlədən də daşnak gənclərə istehza ilə yanaşmıram, sadəcə olaraq bunları deyirəm, çox qəribədir ki, mən parlamentdə Göyçə gölündən suvarma haqqında iclasa sədrlik edirəm, həmin vaxt isə Daşnaksütun Gənclər Birliyi hökumət binasının qarşısında piket keçirir”.
Crossmedia.az xəbər verir ki, bu barədə bu gün Ermənistan parlamentinin iclasında parlamentin sədr müavini Ruben Rubinyan bildirib.
“Piketin gündəliyi də Ermənistan-Türkiyə tənzimləmə prosesində danışıqlar aparanlara öz narazılıqlarını bildirməkdir. O danışıqları aparanlardan biri də mənəm. Bu, Daşnaksütunun çox tipik addımıdır: gecikmiş, mənasız və yalan məlumatlara əsaslanan bir iş görmək”, - deyə o qeyd edib.
Rubinyan qeyd edib ki, həmin “piket” iki saat əvvəl keçirilməli idi, ikincisi isə hökumətdə deyil, XİN-in qarşısında olmalı idi, çünki görüş XİN binasında keçirilirdi.
“Bu piketin məzmunu ondan ibarətdir ki, guya danışıqların predmeti xalqdan gizli saxlanılır. Gizli saxlanılmır, əziz xalq, biz Ermənistan-Türkiyə münasibətlərinin tənzimlənməsi prosesini müzakirə etmişik və yaxın saatlarda mətbuat üçün açıqlama olacaq, məsələ bundan ibarətdir. Mən sadəcə olaraq göstərmək istədim ki, Daşnaksütun rəhbərliyi mənasız və yalan gündəmlər arxasınca gedir və həmçinin göstərmək istədim ki, öz gənclərinizi də düşünmürsünüz. Heç olmasa onlara məlumat verəydiniz ki, artıq gecdir”, - deyə Ermənistan parlamentinin sədr müavini bildirib.
Qeyd edək ki, Daşnaksütun gəncləri Ermənistan hökumətinin binasının qarşısında aksiya keçiriblər və burada xüsusilə belə bəyan ediblər: “Ermənistana Türkiyənin xüsusi nümayəndəsi Səirdar Kılıç Ermənistan-Türkiyə dövlətlərarası yollarının tənzimlənməsi adı altında gəlib, lakin hamımız başa düşürük ki, bu görüş siyasi tərəfin ilkin şərtlərinin yerinə yetirilməsi kontekstindədir. Bunun bariz sübutu Ermənistan hökumətinin səfərin vaxt cədvəlini və gündəliyini gizli saxlamasıdır. Biz buradayıq ki, inkar siyasətinə qarşı olduğumuzu deyək”.
10:21 13.09.2025
Oxunuş sayı: 4062
