Rusiya yenidən Ukraynanın qərb bölgələrinə raket zərbələri endirdi
Rusiya növbəti dəfə Ukraynanın qərb bölgələrinə kütləvi raket hücumu həyata keçirib. Vinnitsa vilayətinə raketlərin düşdüyü, İvano-Frankovsk ərazisi üzərindən isə raketlərin Zakarpatyaya doğru hərəkət etdiyi məlum olub.
Crossmedia.az bildirir ki, paralel olaraq Polşada da vəziyyət kəskinləşib. Bu gecə Polşa ordusu bir neçə rus pilotsuz uçuş aparatını vurub. Hadisə “miqyasına görə misilsiz” adlandırılıb və vətəndaşlar üçün ciddi təhlükə olduğu vurğulanıb. Hücum zamanı Polşa və NATO qırıcıları havaya qaldırılıb, hava hücumundan müdafiə sistemi tam döyüş hazırlığına gətirilib. Bir müddət ərzində Jeşuv, Lyublin və Varşava hava limanlarının fəaliyyəti dayandırılıb.
Polşanın baş naziri Donald Tusk ordunun sərhədi pozan dronlara qarşı silah tətbiq etdiyini təsdiqləyib və “dəfələrlə təkrarlanan pozuntulara” cavab olaraq əməliyyat başladığını açıqlayıb. O, bu səbəbdən fövqəladə hökumət iclası çağırıb, Müdafiə Nazirliyi isə təcili ehtiyat qüvvələrinin toplanması barədə qərar verib.
Beynəlxalq müstəvidə də hadisə rezonans doğurub. ABŞ konqresmeni Co Uilson prezident Donald Trampa Rusiyaya qarşı yeni sanksiyalar tətbiq etməyi təklif edib. Onun sözlərinə görə, NATO müttəfiqi olan Polşaya edilən dron hücumu “müharibə aktı”dır. Uilson Vladimir Putini “müharibə cinayətkarı” adlandıraraq Rusiyanın hərbi maşınının zəiflədilməsi və Ukraynaya Rusiyaya zərbə endirmək üçün silah verilməsinin vacibliyini vurğulayıb.
Konqresmen əlavə edib ki, Putin artıq yalnız Ukrayna ilə müharibə aparmır: “O, birbaşa NATO-nun qətiyyətini sınağa çəkir. Rusiya sərhəd tanımadığını göstərir, amma azad ölkələr ona sərhədlərin nə olduğunu göstərəcək”.
Mehriban
10:19 10.09.2025
Oxunuş sayı: 4755
