Körpə ölümləri artır: "Səhiyyəmizin bir nömrəli problemi..."
Astarada 10 aylıq körpə ölüb. İlkin məlumata görə, Astara rayonu Siyəkü kənd sakini - 2024-cü il təvəllüdlü körpə Elcan Taleh oğlu Həsənzadənin bədən hərarəti yüksəlib. Körpənin valideynləri zəhərləndiyini düşünərək ona sodalı su içiriblər. Halı daha da pisləşən körpəni yaxınları əvvəlcə Şürük kənd xəstəxanasına, oradan da Lənkəran Rayon Mərkəzi Xəstəxanasına çatdırıblar. Həkimlərin səyinə baxmayaraq, körpənin həyatını xilas etmək mümkün olmayıb.
Meyit aidiyyəti üzrə təhvil verilib.
Faktla bağlı araşdırma aparılır.
Ümumiyyətlə, son vaxtlar uşaq ölümləri artıb. Valideynlər yenicə sevinirlər ki, bu xoşbəxtlik özünü kədərlə- övlad itkisinin qəhəri ilə əvəzləyir.
Həkim Şahvələd Məmmədov artan uşaq ölümləri barədə Crossmedia.az-a danışıb: “Səhiyyənin bir nömrəli problemi 1 yaşa qədər körpə ölümləridir. Övladlarda temperatur müşahidə olunan zaman valideynlər ilk tədbir kimi əllatlı istifadə etdikləri nurofen və yaxud da parasetamol tərkibli siroplardan istifadə edə bilərlər. Və yaxud da ən pis halda "yayındırıcı müalicə" deyilən bir terapiya var. Yəni körpəni yaş dəsmala bürümək və yaxud da sərin suyun altında saxlamaq lazımdır. Digər müdaxilələr — valideynlərin özləri tərəfindən antibiotik inyeksiyası və yaxud da "simes" deyilən iynələrin vurulması — qətiyyən qadağandır, belə bir şey yoxdur. Onlar ancaq təcili yardım və yaxud da xəstəxana şəraitində vurulan dərmanlardır. Bəzən valideynlər özləri müdaxilə edirlər, bu isə ağır fəsadlara, hətta ölüm hallarına səbəb ola bilir".
Mehriban Yariyeva
14:37 02.09.2025
Oxunuş sayı: 7926
